“Lada ym meh ding shi taiew, yn ia khih”

Shillong, 10 Naiwieng:
Ka Monitoring Com mittee Against Unstable Power Supply (MCA UPS) ka sengbhalang kaba dei peit halor ka jingpynbiang ia ka bording ha East Jaintia Hills District hapoh ka jingialam u President jong ka u Bah Satly Ryng khlem bad u General Secretary u Tyrnit Pdein myn ha ka 5 tarik mynta u bnai ka la leit ia kynduh ia ki heh jong ka MeECl, Khliehriat Distribution Division ban dawa na katei ka tnad ai bording ban pynbiang ding wut wut ha East Jaintia Hills District khamtam ia ki 50 tylli eiei ki shnong ki bym ioh bording thikna ha kine ki lai bnai ba la dep na ka bynta ka jingmyntoi jong ki paidbah bad ruh khamtam eh namar ka eksamin jong ki khynnah skul ka la jan sdang mynta.
Ka kyrwoh na katei ka seng ka la iathuh ba ha katei ka jingiakynduh kam shym la ioh ia kynduh ia u EE jong ka MeECL Khliehriat Distribution Division, kumta ki la ia kynduh noh ia u SDO bad u JE jong ka katei ka tnad sam bording bad ki la aiti ruh ia ka dorkhas ha kitei ki heh jogn katei ka tnad. Ha ka jingiakren jong ki bad kitei ki heh jong ka MeECl, ki la dawa na ki ban pynbiang bording kloi kloi ha ki 50 tylli eiei ki shnong jong ka EJHD ki bym ioh bording thikna mynta ka la kumba lai bnai tam ei ei. ki la dawa ruh na katei ka tnad jong ka MeECL ban khein pynduna ia ka bait hang ding ia baroh ki longing jogn ki 50 tylli ki shnong ha EJHD ki bym shym la ioh lai thikna ha kine ki khyndiat bnai bala dep.Ha ka jingiakren ki heh jong katei ka tnad ki la kular hakhmat ki nongialam jong ka MCAUPS ba kin pynbiang bording ia kitei ki 50 tylli tam ki shnong kum ba julong ha ki por ba la dep hapoh shitaiew. “Mynta ngi dang ap ia katei ka jingkular jong ki la kan urlong shisha ne em,” ong u Secretary jong ka MCAUPS, u Bah Tyrnit Pdein.
 Katei ka seng ka la pynkynmaw ba 50 tylli tam ki shnong hapoh EJHD kim ioh ding thikna shuh mynta la lai bnai tam ei ei bad kane ka jinglong jingman jong ka bording ha EJHD ka la ktah jur ia u paidbah ha baroh ki liang, khamtam ia ki khynnah skul ba pli ki ba la don Selection Test . Ia ka kopi jong ka Dorkhas katei ka seng ka la phah ruh sha u MLA ka thaian u bah Justine Dkhar, bad ruh sha u DC jong ka EJHD ban kyrpad lem ia ki ban tuklar lem ia kane ka jingkordit jong kitei ki shnong ha ka jingiadei bad ka bording.  Ka MCAUPS ha ka kyrwoh ka la ong ruh ba mynta ka dang ap ba katei ka tnad kan pyntreikam ia ki kular jong ka ban pynbiang ding hapoh shi taiew bad ka la byrngem ruh ba lada kim lah ban pynurlong ia ka jingkular jong ki, katei ka seng kan pynlong da ka jingiakhih paidbah.