Ka Wahumkhrah kaba jakhlia

Shillong, 7 Naiwieng:
Ka Bharat Sanchar Nigam Limited ( BSNL) ka la sdang ban pynkhuid ia ki sawdong sawkun bad ia katei ka kam ka la sdang shuwa na la ing; kata da kaba pynkhuid lut phar ia ki kyndong kynshrot kiba don hapoh katei ka ophis, kaba la ia shim bynta da U Chief General Manager U DP Singh.
Haba kren sha ki nongthohkhubor U DP Singh, u la ong ba kam dei ka sien kaba nyngkong ba katei ka ophis kan shim ia ka sienjam ban pynkhuid ia ki sawdong sawkun, hynrei ka dei kaba la dep sdang la shisnem shiteng mynta, ha kaba u la iathuh ba ia katei ka kam ka BSNL; ka la sdang ban pyni da ki kam ha ki katto katne tylli ki jaka bad ki briew jong kito ki jaka ki la ia bud bad ia mih ryngkat ban ia snohkti lem bad ka ophis bad u la ong ba nyngkong ka la sdang da kaba leit ban tied jingkhang ha manla ki thliew ing ban ia snohkti lem hynrei mynta ki paidbah ki la mih hi.
Haba la kylli na utei u CGM hato katei ka jingsdang ban pyntreikam ia ka jingpynkhuid kaba la tip kum ka Swachh Bharat Abhiyan, ka dei kaba baroh ki ophis sorkar ki leh khohreh; tang mar ia wan ka sorkar u Modi, u Singh u la ong ba ka lah ban dei ha kiwei pat ki tnad hynrei ka BSNL ka la leh ia kane ka kam shuwa ban wan ka sorkar u Modi ruh.
U la iathuh ba ha kitei ki shisnem shiteng kiba ka BSNL ka la iaid lynti ban pynkhuid ia ki kyndong kynshrot, u la la tur sha ki jaka ba jaboh tam kata ha Oakland, hajan ing u myntri rangbah ka jylla, bad ha Rynjah Colony, hynrei haba la kylli ha ka jingiohi jong u mynta kino ki bynta jong ka nongbah Shillong kaba jaboh tam, u la ong ba ki jaka ba jaboh tam ki dei kito ki jaka kiba don ki wah, kaba kham paw hi ka dei ka Wah umkhrah u la ong.
Haba kren shaphang ka jingpynkhuid ia ka mariang, u Singh u la ong ba bunsien ki jingiakren ki kut tang ha ki miej jingiakren bad kim ju poi shano shano ruh, namar la shu ia heh tang ka jutang, hynrei ka donkam ban pyni ia ka kam, dei na kata ka daw ba ka BSNL ka la sdang ban pyni da ki kam. “Ki jingiakren ki la shu kut tang ha ki seminar, ki miej ia phylliew, kim poi shano shano ruh” ong u Singh.
U Singh u la ong ba katei ka ophis jong u kan sdang noh ia katei ka jingpynkhuid mariang ha man la ki taiew ba –ar ka sngi thohdieng bad sngi saitjain naduh ka por 3 baje haduh ka por 5 baje kaba mut ar kynta, bad kumjuh ruh ha ka sngi u Blei.