Pynneh shwa ka MBOSE,

Shillong, 7 Naiwieng:
Ka Meghalaya Board of School Education (MBOSE) ka dang pynneh shwa ia ki juh ki kot saian na ka bynta ka klas XI, hadien ba la mih ka jingpyrshah na ki nongdie kot, ki kmie ki kpa namar ba ka long khohreh khlem da ai da ka por kaba biang.
Kham mynshwa hadien shitaiew ba la mih resol klas X; ka MBOSE ka la pynmih ia ka jing pynbna ba ki khynnah na bynta klas XI, kim dei ban thied kot, hynrei hadien ba la mih ka jingpyrshah ka MBOSE ka la rai ban pynneh biang ia kijuh ki kot pule.
Katkum ka thym mei khubor ba la ioh, mynta na ka liang jong ka MBOSE ka la rai ba mynta u snem bad la shem snem kin pynneh shwa ia ki juh ki kot pule bad ha u snem 2016 kan sa pynkylla noh ia kine ki kot.
Ki kot saian ba ka MBOSE ka la thmu ban pynkylla kham mynshwa ki khynthup ia ka Physic, Chemistry, Biology naduh ka kot pule bad praktikal.
Ka daw ba ka MBOSE ka la thmu ban pynkylla ia kine ki kot saian ka dei namar ba kine ki kot kim long kiba biang ban pule na bynta ki khynnah.
Ka jingthmu ka MBOSE ban pynkylla hak dak khlem da pynbna biang por ia ki kot pule saian klas XI ka la ktah ia ki khynnah, ki kmie ki kpa bad khamtam eh ia ki nongdie kot namar ba bun ki ladep thied ia ki kot bad ruh ia ki nongdie kot kiba la buh stock lypa. Kane ka jingpynkylla syndet ha ka khyllipmat ia ki syllabus ka la pynshaiong ngain ia ki nongdie kot kiba ladep buh thup lypa ia ki kot science XI ba la thied na ki kompeni.
“Namar kane ka jingpynkylla ka MBOSE ia ki kot pule ka la mih ka jingpyrshah na ki nongdie kot namar kan wanrah ka jingduhnong da ki lak tyngka”, la ong uwei na ki nongdie kot.
Ka dor jong ki kot saian kynthup ka Physic, Chemistry, Biology naduh ka kot pule bad praktikal ka la kot sha ka T. 1065 tyngka eiei.
Ka thymmei khubor, ka la iathuh shuh shuh ba ki kot Chemistry kam don shuh, namar ba ka kompeni kam shym la shon shuh ba la kut ka jing ia kut bad ka kompeni shon kot.