Khot ka kashari ia ka Deborah

Tura, 7 Naiwieng:
U Chief Judicial Magistrate (CJM) jong ka East Garo hills, ula bthah ia ka Deborah Marak bad uwei na ki nongkyrshan jongka, U Tennydard Marak, ba kin leit ban hajir ha katei ka kashari, ha ka 14tarik Naiwieng 2014, halor ka jing kynnoh, ba ki donkti bad ki lehnoh GNLA.
Katei ka kashari, ka khot hajir ia ka Deborah bad U Tennydard, halor ka jinglap sakhi jong ki pulit, ba kitei ki arngut, ki don kti ha ka jingiadei bad ka seng kaikhlaw GNLA.
La kynnoh ba ka Deborah, ka pyndonkam da ka GNLA, ha kaba pynjop ialade, ha ka elekshon MLA ba dang shu dep, ha kaba ka myntri ka kyntait ia katei ka jingkynnoh.
U Tennydard, uba la ujor halor ka jinglong Scheduled Tribe jong U Mukul Sangma, ula ngat lang ha katei ka jingshah tian bishar, namar ba u don kti lang bad ka Deborah, na ka bynta ban ioh ia ka jingjop jongka, da kaba pan jingkyrshan na katei ka seng GNLA. La ujor ia ka Deborah, da U Jonathan N Sang ma, uba dei u kandidet shimet, uba kynnoh, ba ka Deborah, ka pyndonkam da ki kaikhlaw, ba kan jop ia katei ka elekshon.
La bthah ruh ba lada jia ba kim leit ha katei ka sngi, ba la buh, yn shim, ba ki dei kiba la phet tuh, na ka jingbishar jong ka kashari.