Ym don dohmet

Shillong, 6 Naiwieng:
Hadien ka jingrisain u bah Pyniaid Sing Syiem na ka kam Deputy Chairman, katei ka shuki ka la shu sah rynghang haduh kine ki sngi bad katei ka la pynsuba sniew ia ka liang pyrshah ba ka jing bym lah ban pynmih Deputy Chairman da ka ARPA ioh ka dei pynban ba ka don ka jingbym ia sngewthuh jingmut ha katei ka kynhun kaba bat ia ka bor synshar.
Haduh ba thoh ia kane ka khubor na ka liang ki nongialam ka ARPA ki kam ba kam don kano kano ka jingbym sngewthuh jingmut hapoh katei ka kynhun bad haduh mynta katei ka kynhun synshar ka tylli mlon, ka jingkylli kaba mih mynta pat ka long hato ka kam deputy chairman ka dei ka doh shyieng kaba khlem sop dohmet shuh, naba ki MDC ka liang synshar ki kyrngah khlieh ban shim ia katei ka shuki.
Katkum ka jingiathuh u CEM u la ong ba kam jied Deputy chairman na ka liang ka ARPA ka dang iaid shaid shaid bad ka jingbym lah ban sei ia u nongshimti ia katei ka kam thylli haduh kine ki sngi ka la pyni ba ym don bam on ban shong ha katei ka shuki.
Lah ban pynkynmaw ba kham mynshuwa ha ka por ba u bah James Ban Basaiaw moit, u la hiar shuki na ka kam EM u la kren da kaba shai bad u la kyrngah khlieh ban shim ia ka shuki Deputy chairman. Haba wad jingtip na ki tyllong khubor hano ka ARPA kan bynshet ia katei ka kam, la iathuh na na ka liang ka KHNAM uba lait met sa tang u bah Basaiawmoit hynrei utei ruh u la kyrngah khlieh, katba la ong ba na ka liang ka HSPDP ruh kam treh ban shim ia katei ka kam namarba kumba ka long mynta ka kam Chairperson ka la bat, ryngkat 2 ngut ki EM, bad shen kan sa ioh sa uwei u EM uba ka CEC jong ka ka la tyrwa da u bah Morningstar Mawsor. Ki MDC ka HSPDP ki bym pat bat kam mynta ha ka ARPA ki sah sa tang u bah Pyniaid uba la iehnoh ia katei ka kam bad u bah Ardent M Basaiawmoit uba la iehnoh ia ka kam CEM, kaba ki tyllong khubor ki la iathuh ba kin ym treh shuh ia katei ka kam.
La iathuh ruh ba mynta ka ARPA ka la phai khmat sha ka UDP ba kan shimti ia katei ka kam, ka UDP ka la don 4 ngut ki EM, ki ar ngut pat ki MDC ka UDP ki bym shym la bat kam ki dei u bah Metbah Lyngdoh bad u bah Brolding Nongsiej, kiba dei ruh ha kajuh ka por ki MLA. La ong ba ka long kaba jwat bha ia u CEM ban wad Deputy chairman ha kane ka kynti ba mynta bad dei na kata ka daw ba ka la shimpor haduh ba ka ARPA kam pa lah haduh mynta ruh ban shim rai. Ki tyllong khubor ki la iathuh ruh ba ban pyni ba ka ARPA ka tylli mlon ka EC ka la bret ti ha u nongialam ka UDP u bah Teinwell Dkhar ban pynkohnguh da ki MDC jong u ban shimti ia katei ka kam.