321 ngut kiba shongkha,

Shillong, 5 Naiwieng:
Na ki nongshong shnong jong ka East Khasi hills baroh ki don tang 321 ngut kiba shongkha shong man kiba la ithuh (register) da ka sokar haduh mynta. Kane ka long katkum ka jingtip ba la ioh da ka ain wad jingtip paidbah (RTI)na ophis jong u Deputy Commissioner ka East Khasi Hill District.
Katkum ka jingtip ba la ioh da ka ophis u Rupang, napdeng ki jaidbynriew khasi kiba shongkha khleh da ka jingithuh ka sorkar ka long ba kham bun hi ki dei ki kynthei khasi kiba shongkha khleh ha kaba baroh ki don 39 ngut katba ki shynrang ki don tang 10 ngut kiba shongkha ia ki kynthei ki bym dei khasi.
Haba shu peit katkum ka recod ba la ioh, ka pyni ba ki briew kim pat kwah ban wan sha khmat ban rejistar ha ka kam shongkha shongman. Lehse ka daw ka long namar ba ka sorkar kam shym la ai kano kano ka jingialap ne jingpynshai paidbah halor kane lane ka lah ban long ba ki briew kim pat kwah ne kim don mon.
Ha kine ki sngi la ju iohsngew ba ka shongkha shongman ka la mih bun ki jingsynjor ha kaba bun ki longing longsem ki iapait khiewja haduh ba ka longing longsem ka la kylla lyngkrang khamtam ha ka jaidbynriew khasi.
Ka jing rejistar ia ka shongkha shongman kalong kaba donkam bha khamtam ia kiba shongkha khleh khnang ba kan pynlait ia kano kano ka jinglong laitlan bad ka jingiapait iapra ha ki longing longsem.
Katkum kane ka ain ki shynrang ki lah ban iapoikha hadien ba ki la dap 21 snem shaneng mkatba ki kynthei kim dei ban duna ia ka 18 snem shaneng.
Nalor kine ki don ruh 60 ngut kiba shongkha khleh ki bym dei na kajuh ka niam. Ia ka shongkha shongman la rejistar katkum ka ain Special Marriage Act 43 of 1954.
Na ka liang ka ophis jong u DC kam shym la don rekod ia ka jingdon jong ki briew kiba la pyllait san shyieng namar ba ia kane ka kam la leh ha ka Kashari jong ka District Court.
Ka ophis kam shym la ai jingtip ruh ia ka jingdon jong ki kristan kiba iathoh bad ki bym dei kristan bad ki ba don ha niam tynrai.
Hynrei la shu pyni ba kam shym don kano kano ka jingkhang ban iapoikha bad kino kino ki jaidbynriew ne ki jait niam.
Katkum kane ka ain Special marriage 43 of 1954, kam shym la don ruuh kano kano ka kyndon kaba lah ban pynshitom ia kino kino kiba shongkha khlem rejistar.
Ka dor jong ka bai rejistar ka long tang T.22.