Kwah pynlong Digital City,

Shillong 5 Naiwieng:
U Myntri Rangbah ka jylla u Mukul Sangma hynne ka sngi u la sam 25000 tylli ki M-Tablets sha baroh ki khynnah skul kiba pule ha ka klas XII ka East Khasi Hills District.
Haba kren mynta ka sngi u Myntri Rangbah ka jylla u Mukul Sangma ha ka jingsam ia ki tablet sha ki khynnah skul u la ong ba ka sorkar ka la thmu ban pynlong ia ka Shil long kum ka nongbah ‘digital-city’ ha kaba ki skul ki don ia ka Wireless Fidelity (WiFi) kum ka jingpynkup bor ia ki baroh ki samla.
“Shillong bad ha Tura bad kiwei ki jaka jngoh kai pyrthei kin don iaka WiFi,”la ong u Sangma.
U la ong ba baroh ki skul kin don ia ka WiFi bad ia kane yn sdang ban pyntreikam hapoh ar bnai na bynta baroh ki skul kiba la buh thong ka srkar ban pyndonkam.
“Ngin iasoi ia ka soskular bad ka kompeni ban pyntreikam ia kane ka projek ha une u bnai”, la ong u Mukul.
Mynne ka sngi la sam ia ki tablet sha ki 2500 ngut ki khynnah pule klas XII lygba ka skhim Student Digital Learning Aid Scheme (SDLAS).
U Myntri ka Information and Technology u bah AL Hek u la ong ba ka jylla Meghalaya kadei kawei na ki jylla ha North East ka ban sam ia ki mobile tablets sha baroh ki khynnah skul klas XII.
U la pynkynmaw ba mynshwa ka sorkar ka la sam ia ki M-Tablet sha ki 24000 ngut ki khynnah kiba pule ha ka klas XII.
Katba ka Myntri kam pynroi sor ka kong Ampareen Lyngdoh, ka la ong ba lyngba kane ka tablet ki khynnah ki lah ban ioh bun ki jingmyntoi ha ka jingnang jingstad lyngba ki kor internet lada ki nang ban pyndonkam bha ha ka rukom badei.
Lyngba kane ka M-tablet kan iarap bad kan pynsuk shibun ia ki khynnah ha ka jingpule jong ki namar mynta lah ban shem lut ha ki internet, la ong ka kong Lyngdoh. Bad ka la kyntu ruh ia ki khynnah ba ki dei ban kyntiew ha ka liang ka pule puthi.
Katba u Chief Secretary ka sorkar jylla u bah PBO Warjri, u la ong ba kine ki tablet kan pynsuk ia ki khynnah namar ba ia kino kino ki jingtip lah ban shem lut lyngba ki kor internet.
La don lang ha kane ka sngi u MLA ka Mylliem Bah RV Lyngdoh, u myntri ialehkai Zenith M Sangma, u DC ka East Khasi Hills bad kiwei ki heh ki hain nalor ki khynnah klas XII.