Pynjulor u slap, ia ka thain Riwar

Bah Monarch Shabong

U slap uba jubor tyngeh, ula ther ha ki bun taiew ba ladep bad la iohi ia ki lum kiba la khyllem, ki wah kiba la shlei mam, ki iing ki sem, kiba shah rong noh bad ka pung Umiam, kaba la dap miar.

Haba peit ha kine ki sngi, ngi iohi, ba ka jinghap slap, katba kum ka jingthew jong ka tnat peit mariang ka sorkar India (Meteoro logical Department), ka pyni ba ka thain Riwar, ka kiew shibun, ka jinghap slap bad katei ka long, lyngba ka jingkhein, kaba ngi ioh man ka sngi na ka jingthew slap, kaba na Sohra. Haba ka long kumta, ka paw, ba lada ka umiam, ka la shlei ha Ri Bhoi, kumta katno tam ka thain Riwar, kan nang shlei ar shah, lai shah, namar ba ka ju ioh slap tam, na kaei kaba ioh sha Bhoi.

Ka mat kaba ngin iakren hangne pat, ka dei halor ka jing tuid noh ka khyndew na ka thain Riwar sha Bangladesh, kaba mynshwa ha kaba U Bah BB Lyngdoh, bam kwai ha duwar U Blei, ula ju ong ba ki million ton, ka khyndew, ka tuid na Meghalaya shathie sha Rithor. Kat haduh mynta, ngi iohi, ba ka sorkar Jylla lane ka sorkar India, ka ju iakren ban pynbha bad ban pynbeit ia ka iaid ka ieng jong ki wah bah; hynrei kam pat ju ia kren ia katei ka jingrong noh u slap, ia ka sboh kaba mih na ka thain Riwar bad kaba shu tuid ei sha Bangladesh man ka sngi, khamtam ha ka por lyiur.

Ha ki phew snem mynshwa, la ju tip ba ka thain Riwar, ka dei kaba sei soh, hynrei ha kine ki sngi, ka sboh, ka la hoit lut sha Bang ladesh bad la iohi, ba ki jaka puta, ki la kylla mawsiang suda bad nangta ki jaka rep, ki la nang ring sdot bad wat ki iing briew, ki don kiba ia tyngkhuh bad ki mawsiang bad katei kan nang jubor ha ki snem ki ban sa wan, lada jia ba kam don ka jing pyrkhat kaba kyrkieh.

Ka tnat border area, ka dei kawei na ki tnat kaba dei ban peit kyrkieh ia katei ka jing rong noh ka um ia ka khyndew na ka thain Riwar bad nangta, ka Soil Conser vation, kan dei sa kawei pat ka mat, lem bad ka Disaster Management bad ka la dei ka por, ban shim jingkhein noh ia ka jingduh noh ia ka khyndew ka shyiap, na ka thain Riwar sha Bangladesh bad ban leit sha ka sorkar India, ba kan shim ia ka lad jingiada kaba kyrkieh, ha shwa ba ka thain Riwar, kan kylla long ka jaka kaba long shrah bad ka ban ktah jubor ia ka rep ka riang, kaba dei u budlum jong ka thain.