Kynriah ka Meghalaya, ia ka jaka eksamin Covid na Byrnihat, ba pyneh ka Assam

Shillong: Ka sorkar Meghalaya, ka hap ban pynkynriah noh ia ka jaka eksamin Covid jongka na Byrnihat, namar ka jing pynbor jong ka sorkar Assam.

Ka North East Now, ka iathuh ba ka Assam, ka la ujor pyrshah ia ka jingplie ia katei ka jaka eksamin Covid ha Byrnihat, kaba don mar shiliang surok, hapdeng ka Meghalaya bad ka Assam, ha kaba la ai daw, ba katei ka jaka, ka hap ha ka surok bah National Highway. La iathuh ba ki pulit Assam, ki la kyntait ruh ban iatrei lang bad ki bor sorkar ka Meghalaya, ha kaba peit ia kiba pang khlam covid 19.

U Bah Prestone Tynsong, Deputy Chief Minister ka sorkar Meghalaya, haba kren sha ki kotkhubor mynta ka sngi, u iathuh ba ka sorkar Jylla, ka la rai ban kynriah ia katei ka jaka peit nongpang covid, hadien ka jingkieng ha Umtrew, na ka daw jong ka jing ujor jong ka sorkar Assam. U bah Tynsong, u ong ba ka sorkar Assam, ka pyrshah ia katei ka jaka, namar ba ka pynthut ia ki briew jongka, kiba leit sha Upper Assam.