Phler ka lbong u draibar, ba shoh ki pulit pyniaid kali

Shillong, 4 Naiwieng:
Uwei u Draibar Sumo ba la tip kyrteng u Teibor Ryntathiang, mynta ka step sngi Hat majai ha ka por kumba 9baje mynstep u la kynnoh ba u la shah shoh ha ki ar ngut ki pulit hajan Civil Hospital Shillong.
Katkum ka jing iakren bad u Bah Rynta thiang, u la iathuh ba ar ngut ki pulit pyniaid kali (traffic) ki la shoh la kynjat ia u ha ban da khoh pler ka lbong bad ki la thap ar sien na ngab ia u namar ba u iaid suki ba thmu ban thep briew ban kamai sha Guawahati.
U Bah Ryntathiang u la iathuh ba tang namar ka daw ba u iaid suki kine ki ar ngut ki pulit ki la shu patan ia u sha ka jaka ba ieng ki pulit ba pyniaid kali bad ki la shoh ia u khlem da kren da ka ktien hynrei ki la shu jrong kti jrong kjat ia u bad ruh ki la shain kuna ruh T.500 ia u.
“Lada nga bakla balei ban da shoh da dat ianga shu shain kuna beit”,la ong u Bah Ryntathiang.
Kine ki ar ngut ki pulit ba shoh ia u, uwei la tip kyrteng Krishna Deo Roy bad uwei pat ym shym la tip kyrteng , la iathuh u Bah Ryntathiang.
Une u bah udei uba kamai sumo na Shillong sha Guwahati uba niah ia ka sumo ba don ia u nombor ML05-G-9738.
U la iathuh ba kine ki pulit ki la pynsahngeh lai tylli ki kali sumo hynrei ia kine ki kali kim shym la bat eiei ki, ki la pyllait beit kumto. Katba ia u pat ki bat ia ka kali ki shu knieh beit ia u shabi kali bad ki shu patan beit ia u sha ka jaka ba ieng ki pulit ba pyniaid kali.