T.22 klur ym pat ioh ka Housing Board, ia ka ram shna iing

Shillong, 3 Naiwieng:
Ka Meghalaya Housing Board ka dang dei ban ioh lum ia ka pisa kaba kumba T.22 klur eiei na ki briew kiba shim ram na kane ka tnad ban shna iing.
Katkum ka thym mei khubor ba la iohlum na ka tnad Housing, la tip ba kane ka tnad ka dang dei ban ioh ia ka pisa na ki briew ki dang shah ram ha ka bad lada ka sorkar ka shim khia ban leit lum ia kane ka pisa kaba ka ai ram sha ki briew ha kine ki snem ba ladep haduh snem 2000 kan long kaba suk ban siew ia ka tulop ki nongtrei.
Lada shu shim bad peikai na kane ka ram ka sorkar kam don jingeh lada ka mon ban lum thikna ia ki pisa na ki nongshim ram ban siew ka tulop jong ki 39 ngut ki nong trei ka tnad Housing Board ki bym pat ioh ia ka tulop jong ki la shisnem shiteng kaba kot kumba T.3 klur eiei.
Ia kane ka Housing Board la seng ha u snem 1986 da ka jingthmu ba ai ram khamtam ia kito kiba na nongkyndong ki briew kiba duk kiba duna ka ioh ka kot ba kin shna ia ki iing sah jong ki. Kane ka long ban pyllait ia ki briew na ka jingshah thlia haba ki leit ban shim ram na ki bank bapher bapher bad ruh ban pyllait ia ki na ka sut kaba heh.
Hynrei ka sorkar ka la pynsahngeh noh ha u snem 2000 ban airam ia ki briew da kaba ai daw ba bun ki nongshim ram kim ju siew shuh.
Hynrei katkum ka jingtip ba la ioh bun ki briew kiba shim ia ka ram ki ju siew pyndep beit ia ka ram ka shah ba ki shim khamtam kiba dei na kane ka thain Khasi Jaintia Hills. Ka jingbym siew tikna ia ka ram ka jubor bha ha ka thain Garo Hills.
Kumba 60 percent ha Khasi Jaintia ki siew ia ka pisa ba ki shim ram katba ka thain Garo hills ka sniew bha ka rukom siew ram.