Ka nurse ba test covid na NEIGRIHMS kam dei kaba bit na u BSF, lah ban dei na Demseiniong

Shillong: U Director jong ka NEIGRIHMS hospital, u Dr P. Battacharya u iathuh ba ka nurse kaba shah ktah ha ka jingpang Covid-19 kam dei kaba ia bit na u shipai BSF u ba la test Covid ha NEIGRIHMS hospital.

Haba iakren bad ki lad pathai khubor u Dr Battacharya, u la pynshai ba ka jingioh covid jong kawei ka nurse ha NEIGRIHMS hospital, yn ym lah ban ong ba dei na kane ka Hospital, namar ba ka khlem trei ne iajan bad ka kamra ba thiah pang u shipai BSF.

U la ong ruh ba ka jingioh Covid jong kane ka nurse ka lah ban long na ka jaka ba ka sah ha Demseiniong bad na ka liang ka NEIGRIHMS hospital kin dang wad ia ka thymmei ba kane ka nurse ka bit ia ka jingpang.

U la iathuh ruh ba ha NEIGRIHMS hospital, mynta ki don 13 ngut kiba pang Covid -19 kynthup ia ki 2 ngut kiba la test positive mynta ka sngi.

Na kine ki 13 ngut kiba la test positive, ki hynriew ngut ki dei ki High Risk contact jong u shipai BSF, 4 ngut ki dei ki nongap pang bad 2 ngut ki dei kiba thiah pang ha kajuh ka kamra bad u Shipai BSF.

Katba 2 ngut ki dei kiba wan ban thiah pang kynthup ia u shipai BSF, 4 ngut ki dei ki ba la lap lyngba ka screening bad kawei ka dei ka nurse.

U la iathuh ba ki High risk Contact jong u ne u shipai ki don 30 ngut bad na kine 24 ngut ki long negative bad 6 ngut, ki long positive mynta ka Sngi.