Sa 28hajar ngut, kiba ioh pang khlam ha India, baroh ki la poi 9lak duna

Ha India, kiba ioh pang khlam coronavirus, ki la kiew sa 28,701ngut ha ki 24 kynta ba ladep bad kiba iap, ki don 500ngut.

Kumta baroh kiba ioh pang, ki la poi sha ka 8,78,254 bad kiba dang shah sumar ki long 3,01,609 ngut, katba kiba la jem na katei ka jingpang, ki long 5.5lak ngut, katba kiba iap baroh ki la poi sha ka 23,000 ngut.

Hynnin ka sngi, ka World Health Organisation (WHO), ka iathuh ba kito kiba ioh pang ha ki 24 kynta ba ladep, ki long 2,30,370 bad ka jingkiew jong kiba pang, ka dei ha US, Brazil, India bad ha South Africa. Kham mynshwa, ka jingkiew ka jur bha, ha ka 10tarik Naitung 2020, ha kaba ki don 2.28 lak ngut, kiba ioh pang ha ka shisngi. Ka jingiap, pat ka long antad 5hajar ngut ha ka shisngi.

Mynta baroh kiba ioh pang khlam ha ka pyrthei baroh kawei, ki la pooi sha ka 13 million ngut bad sa 5.7 lak ngut kiba iap bad ka India, ka wan ha ka kyrdan ba lai, ha kaba ki don 8.5 lak ngut kiba ioh pang bad sa 22,000 ngut kiba iap.

Ha United States, ka Florida, ka kiew bha, ha ka jingdon kiba ioh pang bad la iathuh ba ha ki 24 kynta ba ladep, ki don 15,000 ngut kiba ioh pang thymmai. Lyngba katei ka jingkhein, ka Florida, ka la tam ia ka New York, kaba kiew haduh 13hajar ngut kiba ioh pang, kaba dei ka sngi, kaba bun tam, kaba la jia ha ka 10tarik Iaiong 2020 bad kaba dei ruh ka por, ba katei ka jingpang khlam ka jubor bha ha katei ka nongbah.