Ym dei ban buhrieh kyrteng, ia ki 41 ngut kiba la ejahar

Bah Monarch Shabong

Ka sorkar Jylla, ka la rai ban ejahar ia ki 41 ngut ki briew, kiba leit iathoh sha Greenwood Resort ha Khanapara, Guwahati bad ia katei ka kam, la aiti ha ka Deputy Commissioner jong ka East Khasi Hills District ba kan leh.

Haduh mynta, ngim tip, la ka la don ne em katei ka jing ujor ejahar bad la ka dei ha ka thanat, kaba kumno, hynrei, haba ka la don ka jing ejahar sha ki pulit, ka dei ban iaid lem kumba iaid ia kiwei bad kata ka long ba ki kyrteng jong ki 41 ngut, ki dei ban mih ha ka website jong ki pulit bad ba ki paidbah, kin ia tip ha ki kyndon aiu, ba ka sorkar kan pynhap ia ki bad katei ka long kaba donkam eh ba u paidlang ka Jylla, un ia tip, namar ba kitei ki 41ngut, ki dei ka daw bah, ba la hap pynlong ia ka pakhang shnong, ka ban long ha Lah Sngi U Blei bad Sngi Hat Majai.

Kam dei tang katta, hynrei ki pulit, ki dei ruh ban pynmih ha ka kyrwoh jongki, ba ki la kem ia kitei ki briew, halor ka ejahar jong ka sorkar lem bad ki kyndon ba ki la pynngat pyrshah ia ki.

Kitei ki long ki jingshisha, kiba donkam eh bad kiba la ju leh ia baroh kiba shah ejahar ha ki pulit bad ka jingbuhrieh kyrteng, halor ka kyndon jong ka jingpang khlam kan pyni ba ka sorkar, ka kwah ban shu byrngem tang ka ktien, khlem da pyni da ki kam bad lada ka long kumta, kan nym don don jing myntoi ruh ban pynmih ia ki kyndon kiba man ka sngi, naduh ka jing deng mask, ka jing dain kuna ia kiba khlem deng mask, ka jing ia shong jngai iwei ia iwei pat bad ka jingkhang lad ban ia trei iabun ha ki ophis, kaba la ktah shi katdei ia ka bha ka miat uba bun balang lane ha kawei pat ka kyntien, kaba ki ju ong, ba haba don ki kyndon, uba iap, dei uba bieit bad uba duk, katba uba riewspah bad uba heh kyrdan, u nang muja bad u nang myntoi.

Ka sorkar Jylla, ka la kamai da ki lak tyngka (lehse), na kine ki nong pynkhein ia ki kyndon pakhang shnong, ki jing iaid kali ba khlem don ki korphiw pass kiba biang bad kiba pynkhein ia ki kyndon jong ki odd bad ki even number bad kitei lei ki dei ki kam kiba rit ba ria suda; hynrei lada ia kitei la dain kuna bad sngang bad sngang, khlem da donkam ban leit sha ka iing bishar, kumta kitei ki 41 ngut ruh, ki la pynkhein pyllein pyllein, ha kaba na ka 5ngut ki poi Guwahati sha ka 41 ngut bad katei kam donkam shuh ban ehajar, hynrei ka donkam beit ban pynsaja, kaba iahap bha, ia kitei ki kam ialeh pyrshah ain jongki.