Kiar na ki briew ba nabar jylla, ong ka HYC

Nongpoh:Ba la nangkiew ka jingdon ki briew kiba ioh ia u khning jingpang COVID-19 hapoh ka jylla, na ka liang ki nongkitkam ka HYC Nongpoh Circle, ka kyntu ia ki paidbah kiba shong dukan ha shilynter ka surok NH-6 ha Ri Bhoi, kiba shong ha ki dukan die jingdie bapher bapher, ba ki dei ban phikir bha ialade bad ruh ba ki dei ban kiar na kaba pynjan bad ki briew kiba dang shu wan na kiwei ki jylla.

   Ha ka kyrwoh kaba la phah da u Samla Tony Shylla, General Secretary ka HYC, Nongpoh, la ong ba ka nongrim kaba la pynlong ia ki nongkitkam ka HYC Nongpoh Circle, ba kin kyntu ia ki paidbah ba kin husiar, ka dei hadien ba ki la iohi ba ka jingdon kiba ioh COVID-19, ka la nangkiew katba nangmih ki sngi bad namarkata ka donkam bha ia ki paidbah ba ki dei ban nang kumno ban iada ialade, khnang ban iada na ka jingsaphriang u COVID-19.

    Ka seng ka kyntu ia ki paidbah ba ki dei ban ai ka jingiatreilang bad ka sorkar bad ki dei ban kohnguh ia ki jingbthah ka sorkar, hynrei ka kham ban jur ia kito kiba shong dukan harud ka surok bah, ba ki dei ban sangeh shwa ka ia die ia thied bad ki bar jylla khamtam na ka jylla Assam, pynkut ka kyrwoh.