Pyrshah ka KSU, ban bret ia ki niut jong ki BSF sha Mawlai

Shillong:Ka KSU Mawlai Circle mynta ka sngi, hapoh ka jingialam U Samla Mac Iver Thabah Vice President bad u Samla Rapborlang Nongrum General Secretary, ka la leit ban ia kynduh ia u Myntri ka tnat pynroi Sor u Bah Hamletson Dohling ban leit pynsngew ia ka jingud jingnam jong ki paid nongshong shnong jong ka Shnong Mawlai halor ka jingwan bret ñiut jong ki kali jong ka Municipal, kaba ki la lum na ka ktem jong ki shipai BSF kaba don ha Umpling, kaba ka Sorkar ka ladep pynbna kum ka Containtment Zone.

Ha katei ka jing ia kynduh na ka liang ka seng, ka la pynpaw ba ka jingkiew jong ki nongïoh ïa ka jingpang Covid 19 kumba 3pawa hapoh ka jylla jong ngi ki dei ki shipai bad kito kiba trei ha katei ka ktem shipai kaba la kdew haneng,kumta ka jing wan bret ia kitei ki ñiut kan buh ka jingma ia ki nongshong shnong jong ka shnong Mawlai, namar hadien ba la pynhap ia ki ñiut ki don ki briew hangto kiba trei ha ka ban ban jied bad ban lum ia ki tiar kiba i long ban pynïaid ïew ha kaba die scrap,kumba ka long kitei kiba lum ki dei kiba shong ba sah hapoh ki kyntoit bapher bapher jong ka shnong Mawlai; kumta na ka liang ka seng, ka la kyntu ia u Myntri ba ia mynta ki dei ban pynsangeh shwa ia baroh ki kali bret ñiut kiba wan na ki ktem shipai BSF ban wan bret ñiut hangthie ha Marten.

Kaba ar ka jing pynsngew jong ka Jylli hakhmat u Myntri ka long ba ia mynta ha kum kane por ba ka khlam ka par sted bha hapoh ka Jylla, kan bha ban ym shah bad ban pynsangeh shwa ia kito ki Trok Assam kiba shu wan kit ia kitei ki mar scrap ba ladep lum thup, namar ba kitei ki trok ki ju leit pynhap ia kitei ki mar sha Guahati kaba dei ka jylla kaba la ñiew kum ka Red Zone na ka jing saphriang sted jong utei u khñiang jingpang Coronavirus,sa kawei ruh kitei ki trok kim dei kiba kit ia ki marbam mardih ne kino kino mar kiba kum ki paidbah ki donkam manla ka sngi.

Ha katei ka jing ia kynduh na ka liang jong u Myntri ula phone mardor ia ki ophisar kiba dei peit ia katei ka tnat ba kin pynsangeh noh ia ki kali Municipal kiba kit ñiut na kitei ki jaka bajan bad katei ka ktem shipai bad kumjuh ban pynsangeh shwa ia ki kali Assam ban wan thied ia kitei ki tiar scrap.