Hynnin shisngi, kiew sha ka 521ngut kiba ioh pang khlam ha Guwahati

Guwahati: Hynnin ka sngi, ka Assam, ka don 936 ngut kiba ioh pang khlam ha ka shisngi bad baroh kiba ioh pang ha katei ka Jylla, ki la poi sha ka 15,536 ngut. Na kitei ki don 521 ngut kiba ioh pang, tang ha ka sor bah Guwhati.

U Himanta Biswa Sarma, myntri ka koit ka khiah, ka Assam, hynnin ka miet, u thoh ha ka twitter jongu, ba ki don sa 936 ngut kiba ioh pang ha ka Jylla baroh kawei bad sa 521 ngut kiba na ka nognbah Guwahati.

Haduh mynta, kiba ioh ia katei ka jingpang baroh, ha ka Jylla, ki la poi sha ka 15536; kiba la jem na ka jingpang, ki long 9848; kiba dang shah sumar, ki ong 5650 bad kiba iap ki long 35 ngut.

Tang ha ka sngi thohdieng, ki don 8 ngut kiba iap na Guwahati bad hynniew ngut na kitei, ki dei kiba iap ha Guwahati Medical College Hospital (GMCH), katba uwei u iap ha ka Covid care centre ha Indian Institute of Technology-Guwahati (IIT-G). Tang ha ki saw sngi, ki don 21 ngut kiba iap ha Assam bad baroh ki la poi sha ka 35 ngut.

Kiba la mih na ka jaka sumar ha ka sngi thohdieng, ki long 701 ngut bad baroh kiba la ioh jingkoit ki long 9,848 ngut ha Assam.