Ka khlam corona, na ka iathoh ha Guwahati

Bah Monarch Shabong

Ka jing iathoh kaba kham phylla, kaba la jia ha ka 27tarik Jylliew ha Guwahati, namar ba (i) ka long ka jing iathoh jong ka thei khasi ia u bar Jylla (ii) ka dei ka jing iathoh, kaba hap pynlong sha Guwahati (shabar Shillong), nangta (iii) ka jingiathoh, kaba hap ban iatip paidbah pynban ha kine ki sngi bad (iv), sa ka jing ia thoh, kaba wan rah ia ka khlam coronavirus.

Ki bor District, ki la pynlong ia ka jing tohkit, halor ka jing leh beain ha katei ka jing iathoh bad ka jing beain jongka, ka long ba kiba dei ban leit ki long 5 ngut lane san kali, hynrei ki leit poi pynban sha ka 41 ngut bad ka dei ka jingjia kaba phylla shibun, ba kumno ia ka jingleit kaba mang ia ki 5ngut, kin leit poi pynban sha ka 41ngut bad hangtei kan dei ka jingkylli, kaba naduh na kti jong ka Deputy Commi ssioner jong ka East Khasi Hills, nangta jong ka Ribhoi District, ba kim lah satia ban thet kti, namar ba ki don ia la ki jong ki briew ha madan bad khamtam, haba ki iaid lyngba ka khyrdop ha Byrnihat, bad kumta kitei ki briew, ki dei ban pynshisha, ba ki wan ialade na kaei ka jaka bad ki dei ruh ban pyni ia ki pass kiba biang.

Na kaei kaba paw ha ka jing phah tohkit jong ka Deputy Commi ssioner jong ka East Khasi Hills, la pyni, ba ka jing pan pass, ka dei ha ki kam kiba kyrkieh bad la pyni ruh hangto, ba la iathuh shaphang ka jingleit iathoh bad hangne, ka wan mih ka hukum jong ka sorkar Jylla, ba ka jing iathoh, ka dei lyngba ka jing ai jingbit jong ki bor District bad lehse, lada ka dei makna sha kawei pat ka Jylla, hynrei ha kaba kum kane ka saw ka sian bad haba leit ruh sha ka jaka kaba ki jubor bha ki nongpang, kumta ka la dei ia ki bor jong ka East Khasi Hills District, ba kin teh da ki kyndon kiba pyrkhing bha.

Ngin dang ia peit ia kaei kaba ki bor District kin leh, hynrei katei ka jing iathoh, ka la pyntieng koh tympan ia u paidlang ka Ri Khasi Jaintia bad ka don ka jingshah khang jong ki iing shong iing sah jong ki briew, ki dukan bad ka jingshah pyndik jong kito kiba don jingiadei bad kitei kiba wan kit ia ka khlam na Guwahati bad kumta, lada ka dei ban wan ka jing bishar hok, kumta ka dei ban sdang naduh na ka miej jong ka Deputy Commi ssioner jong ka East Khasi Hills District bad ia ka jing pynkhein, na ka 5ngut sha ka 41ngut, kaba dei ka jingleh pyrshah kaba pyllein pyllein.