Yn dain kuna T.500/-, lada pynkhein ia ki kyndon ka koit ka khiah:Conrad

Shillong: Namar ka jingkiew sted jong ka jingpang Covid -19 ha ka jylla, u myntri rangbah ka jylla u Conrad K Sangma, u iathuh ba ka sorkar jylla mynta ka sngi ka la shim ia ka rai ba kan dain kuna T.500/-, lada lap ba ki nongshong shnong ka jylla ki pynkhein ia ka kyndon jong ka tnad ka koit ka khiah. Kine ki kyndon ki long ban deng ia ki jingda khmut bad shyntur (mask) ha ba ki don ha ki jaka paidbah, ym dei ban biah pathar ha ki jaka paidbah bad ban bud ruh ia ki kyndon ba pyn ia jngai iwei na iwei ka ba la tip kum ka “Social Distancing”.

Haba ia kren bad ki lad pathai khubor, u la ong ba mynta ka la don ka jingkiew ha ka liang ka jingbun ki nongpang Covid-19 ha ka jylla, hynrei ki paidbah kim dei ban tieng, namar kine ki ba ioh ia ka jingpang Covid-19 ki don ha ki jaka sumar bad kin ym lah ban iakhleh bad ki paidbah.

U la ong ruh ba ka jingkiew jong ki nongpang Covid ha ka jylla ka dei na ki shipai BSF, hynrei ka jingioh pang jong ki shipai BSF, ka long kaba lah ban iada namar ki shipai BSF ki shnong shi jaka bad kumjuh ha ka ba iadei bad ki briew kiba wan phai ruh kan ym don kano kano ka jingsaphriang ia ka ne ka jingpang namar ba kiba wan phai na kiwei ki jylla ki hap ban bud ia ki kyndon baroh kiba la buh da ka tnad ka koit ka khiah.

Ha kaba ia dei bad ki briew ki ba la leit ban shim bynta ha ka jingkhawai iathoh ha Guwahati u Myntri rangbah u la ong ba ka long ka ba sngewsih ba ki briew ki la pynkhein ia ki kyndon ba ka sorkar ka buh bad leit ban shim bynta ha ka jingiathoh shong kurim sha Greenwood resort ha Assam.

U la ong ruh ba na ka liang ka sorkar jylla kan dang ioh ia ka kaiphot mynta ka miet, na ki Deputy Commissioner bad ha dien kata ka sorkar kan sa lah ban ai ka jingpynshitom kaba kumno kan shim ia kine kiba pynkhein ia ki kyndon jong ka sorkar.

Na ka liang u Myntri Rangbah, u la iathuh ruh ba ka sorkar kam banse ban shim da ka rai ka ba kham tyngeh ia ki briew kiba shim sting bad pynkhein ia ki kyndon ba la buh da ka sorkar, namar ba ha bun ki jaka ki paidbah kim ju bud ia kaei kaba ka sorkar ka la bthah.