Pan jingshai halor ka jingpyllait khubor laitkam Nonghikai ka Sorkar ha ka kyrdan UP School

Ngi ki Nonghikai ki ba dang shu pass ïa ka MTET, ngi ai ka jingkhublei kyrpang ïa ka sorkar kaba la shimkhia ban pynkloi noh ban advertise ïaki post Assistant Teachers ha ki Govt LP/UP Skul ha kylleng ka jylla jong ngi, hynrei, ngi dap da ka jingsngewlyngoh halor ka jingleh thurmur jong ka sorkar ïa ka rukom pynmih advertisement na ka bynta ki post Asst Teacher ha ki Upper Primary Govt School.

Ha kane ka advertisement la kdew ba la shah tang ïa ki Graduate with 50% for General candidate bad 45% for ST/SC candidates with B.E.d ban apply ha ki Upper Primary skul bad ha kane ka advertisement la kdew ruh ba la leh ïa kane kat katkum ka NCTE Notification dated 23/08/2010- SL 1 and NCTE Notification dated 28/06/2018. Hynrei haba ngi khmih bad pule bniah ïa baroh ar tylli ki tei ki Notification jong ka NCTE la batai shai ba na ka bynta ki post Asst Teacher ha ki Upper Primary Govt School ka qualification ka ong ba ki nonghikai UP ki dei ki ban pyndep ïa ka Graduation bad 2-years Diploma in Elementary Education (DElEd) OR Graduation with at least 50% marks and B.Ed, hynrei, ha ka advertisement pat ka Sorkar kala weng noh ïa ka kyntien D.El.Ed. bad buh tang B.Ed.

Nangta, haba ngi phai ruh sha ka Advertisement jong ka Meghalaya Teachers Eligibility Test (MTET) Letter No. DERT/TET/2012/PT/1122. Dated Shillong, the 29th October 2019, la thoh shai ba ka minimum qualification ïa kiba kwah ban apply naka bynta Cl VI-VIII ka dei ban long B.A/ B. Sc with atleast 45% for ST/SC and 50% for General Candidates and 2- year Diploma in Elementary Education in accordance with NCTE (recognition norms and procedure), regulation 2002. Kumta, kat kum kane ka MTET Advertisement ruh, la kdew shai ba ki DElEd ki long eligible ne lah ban apply ïa ki post Asst. Teacher ha ki UP Skul. Hynrei mynta ynda ngi la pass ka sorkar ka khlem shah shuh ïa ngi.

Halor, kitei ki jingshisha haneng, ngi kwah ban buh kine ki jingkylli harum ïa ka sorkar.

1. Balei ka sorkar ka kyntait ïa ki DElEd bad ka shah tang ïa ki B.Ed ban apply na ka bynta ki UP skul, haba kat kum kitei ki NCTE notifications ba ka la kam ba ka bud, la batai shai ba ki DElEd ruh ki long eligible bad ki lah ban apply.
2. Balei ka sorkar ka khlem bud kat kum ka advertisement ba mynshuwa jong ka MTET (Letter No kumba la kdew haneng) kaba la kdew shai ba “2- year Diploma in Elementary OR B.Ed are eligible for Cl VI-VIII”
3. Hato ki Cl VI-VIII kim hap shuh ne haka Elementary Education ?. Lada ki hap balei pat ïa ki ba pass Diploma in Elementary Education (DElEd) khlem shah pat ban apply.
4. Kano kata ka NCTE notification kaba batai ba ki DElEd ki khlem long eligible shuh ban hikai ha ki kyrdan Cl VI-VIII sngew bha pynshai lem ïa ngi.
5. Lada ka DElEd course kam dei shuh na ka bynta ban hikai Cl-VIII, balei ka sorkar ka phah leh ïa kane ka course ïa ki Nonghikai ha DIETs bad ha NIOS.

Shuwa ban pynkut, ngi kum ki Nonghikai kiba don lem ka jingkitkhieh halor ka pule puthi haka jylla jong ngi, ngi kwah ban buh ka jingkyrpad ïaka sorkar shuwa ba kan ïaid shakhmat ïa kane ka recruitment, ba ka dei ban da pynshai shuwa ïa kine kiei kiei baroh, lada dei ka jingbakla dei ban pynbeit noh mardor. Lada dei ba leh khnang ne leh kyrpang ïano ïano ka dei ban da batai shai. Namar kane ka advertisement ka ba mynta ka khlem bud bniah kat kum kitei ki NCTE Notifications kiba la kdew haneng kiba ka Sorkar ka la kam.

Ha kajuh, ka por ngi kum ki Nonghikai, ngi sngewsih ruh ban pynpaw hangne ba ka Education Department ha ka jing shisha ka dei ban long kaba hakhmat eh ïa baroh ki Department ha baroh ki liang, hynrei haka Jylla jong ngi kane ka Department ka dei kaba don ha ha trai eh bad ha man ba don kano kano ka exam thung kam la ka dei ka kam Contract ne Permanent kan dei ban don beit ki kynrum kynram. Ngi kwah ïa ka sorkar ba ka dei ban da shim khia bha ïa kane ka recruitment kaba mynta ban da pule bad sngewthuh bha shuwa ïaki kyndon ba ka NCTE ka buh bad ban pyntrei ruh thik pathik kum ba ka bthah khnang ba kan lait na kino kino ki jing eh bad kynrum kynram kum ba la ju jïa ha ki por ba ladep. Lada ka Sorkar ka kwah ba ki khynnah kin ioh shisha ïa kata ka jinghikai ba janai ha ki Skul Govt. ka dei ban pyntikna ban jied beit ïa ki Nonghikai ki ba tbit shisha bad ba ki ba kynsai, bad kam dei ban ai lad ban don kano kano ka jingtuklar na ki Politicïan, kum ba ka la jia ha ki por ki ba la dep.
Khatduh, khatwai ngi ai ka jingkitbok kitbok kitrwiang ïa baroh ki para Nonghikai ki ban sa ïa khun ïa kane ka interview, ai ba ki ba tbit shisha bad ki la lah shisha kin ioh ïa ka kam khnang ba ka pule dangle kan kiew stet ha jylla jong ngi.
Kiba burom ïa phi,
San ngut ki nonghikai kiba la buhrieh kyrteng