KA JINGSNIEW BA MIH NA KA JINGBHA

Da u Ex.Rev.K.Langrin, Seinduli, West Khasi Hills District.

Ki paralok kiba pule ia kane ka jingthoh jong nga lehse phin sngewlyngngoh, balei ka don ka jingthoh kaba kum katei – balei ba ka mih ka jingsniew na ka jingbha. Ban jubab ia kata to ngin ia peit na ka Bible. Lk.10:38 – 42.

Ha kawei ka sngi, u Jisu u la leit rung ha ïing jong ka Martha bad ka Mari. Ka Martha ka dei ka hynmen bad ka Mari pat ka dei ka para. Ïa u Jisu la pdiang sngewbha da ka Martha. Kum ka jingpdiang sngewbha ia u nongwankai, ka Martha ka la pynkhreh pynkhrum ia ka bam ka dih bad kam don por ban ia shongkai bad u. Katba ka Mari pat ka la shongkhop ha ki kjat u Jisu.

Ha kine ki dkhot la iathuh shaphang ka jingbha jong ka Martha ba ka la pdiang sngewbha ia u Jisu bad ka la leh bha shibun ia u- da kaba ka la pynkhreh ia ka bam ka dih bad ka la sait bha ia ki khiew ki pliang. Kaba pdiang sngewbha ban ai ja ai sha ia kiba wan kai ka long shisha kaba bha. Ïa ka jingbha jong ka Martha la ithuh ha kaba ka pynkhreh ia ka bam ka dih. Hynrei kaba la pynlyngngoh ka long ba na ka jingbha jong ka ka la mih pynban ka jingbakla bad jingsniew.

(1)Ka Martha ka la pdiang sngewbha ia u Jisu bad ka la leh isynei ia u ha ka bam ka dih. Hynrei ka Martha ka la bakla da ki jingbunkam. Kane ka long kaba sniew.

(2)Katba ka Martha ka dang bunkam, ka Mari pat ka nang shongkhop ha ki kjat u Jisu khlem iarap kam eiei ia la ka hynmen. Te ka Martha ka la bitar ia la ka para. Ka jingbitar jong ka ka long kaba dei hynrei ka mih pynban da ka jingsniew. Kata ka long ba ka Martha ka la pyrta ia u Jisu ba un phah ia ka Mari ba kan wan iarap lem ha ka sait ka khlieng bad ka shet ka tiew.

(3)Haba u Jisu u la rung hapoh ïing, ka Martha ka la leh khuslai shaphang bun kiei kiei. Ka jingpyrkhat khuslai jong ka ka long – u khaw u la lut, ka shini ka la lut, daei yn ai bam ia u nongwan kai? Hynrei u Jisu u pynrem ia ka Martha ba ka buh ha khmat eh ia kiei kiei kiba kynja pyrthei. Hangne u jisu um shym iaroh ia ka jingbha jong ka Martha.

Paralok, halor kane ka jingjia, to ngin ia jngi sha ka thwei jong ka jingpyrkhat kaba iadei bad ka jingim jong ngi.

• Ha ka snem 1989 haba nga leit tour balang sha nong Langtur ryngkat bad ki 6 ngut ki nongbud jong nga, u trai iing u la shet tylli ia kawei ka dohkha bad u la ai tang ia nga marwei. Ïa ki paralok jong nga pat u la ai tang da ka ja bad u jhur khlaw.

Te nga la kylli ia u trai iing, “Balei phim ot ia kane ka dohkha bad ban iasam lem ia ki paralok jong nga?” Uta u trai ïing u la jubab, “Kane ka dohkha ka long tang ia phi u Pastor. Nga ju leh kumne te ia kiwei ki pastor ruh.” Te nga la ong ia u, “Kane ka jinglehbha jong phi ia nga marwei ka long kaba sniew. Kumta, phiah ia kane ka dohkha 7 bynta bad sa ia sam mar kajuh, kata ka long kaba bha.” Uta u trai ïing u la ong, “Kiwei ki pastor kim ju ong kumta kumba ong ma phi hynrei ki shu bam beit.” Te u la phiah 7 bynta ia ka dohkha bad ngi la ia ioh mar kajuh.

• Ha ka snem 2010, shuwa ban long ka jingiaseng Ri Lyngngam Presbytery, la don 2 ngut ki nongpdiang jingiaseng kiba la wan pan kylliang pisa na nga. ki da ong, “Sngewbha ai kylliang pisa ban ioh thied doh, jhur bad shini … na ka bynta ki nongwan Presbytery. bad ynda la kut ka jingiaseng ngin sa pynphai noh ia ka pisa jong phi.” Hynrei hadien ka jingiaseng, shi bnai ruh khlem pynphai, 6 bnai ruh khlem pynphai, shi snem ruh khlem pynphai. Kata ka pynlong ia nga ban sngewsih, namar ba nga ap khmih lynti borabor lano kin pynphai noh ia ka pisa. Kumta na ka jingbha ka poi sha ka jingsniew namarba nga sngewsih.
• Ha ka snem 2014 la don ka jingkhawai ha ka ïing jong u paralok jong nga ha Riangdo. Shuwa ban ia bam ja ka la don ka jingialang ha madan Riangdo. Te u trai ïing u la ong ia nga ban pynbna ba ynda la wai ka jingialang, kiba kham jngai kin leit sha khmat ban bam ja. kumta nga la pynbna. Mar kumta ki la mareh ki nongkyndong sha khmat. Ynda la poi ha iing, la buh ia ka ja ka doh ha ki dabor ba ki nongbam kin khat hi. Ka jingkhlem akor kita ki nongbam ka long ba ki khat ia ka doh haduh bym ngiam shuh ha ka pliang bad kim lah bam shuh. Ha kaba khatduh ki leit theh noh ia ka doh ha ki khiew sniang. Sngewsynei ia kiba wan bam kham hadien kim ioh doh shuh wat tang mar shi dkhot ruh. Ki trai iing ki la leh ia kaba bha pynban ka la poi sha ka jingsniew namar ka jingleh khlem akor kiba bam sha khmat.
• Ha ki jingiaseng ialap, District, Presbytery… la ju iohi ba ki don kiba pynkhreh kyrpang ia ki pastor, ki tymmenbasan, ki nongialap, ki VIP…ka ja, ka doh, ka sha, ki jhur… ki long kiba kyrpang. Shisien pyrkhat kata ka long kaba bha, hynrei haba pyrkhat ha kawei pat ka liang ka jingleh kyrpang iano iano ka long kaba sniew bad ka long ka pop leh shiliang khmat. Ynnai iakren ia kiba don jingshitom.

Paralok, ngeit ne phim ngeit ia nga, ba kato ka jingkam para bangeit tang ia kiba na ka kynhun balang la jong bad ka jingduwai kyrpang tang ia kiba hapoh la ka balang ka long kaba sniew. To ngin ia peit aiu ka la jia ia ka kmie u Jakob bad Ioannis ba ngi lah ban shem na u Mt.20:20 – 28 kaba la kyrpad da kaba dem khohsiew ha ki kjat u Jisu ban ailad ba ki khun jong ka baroh arngut kin ioh shong uwei sha kamon bad uwei sha kadiang ha ka hima u Blei.

Ha ka jingshisha ka jingleh jong ka kmie u Jakob bad Ioannis ka long kaba dei namar ba ka ieit kyrpang ia la ki khun. Hynrei ka la long pynban kaba sniew. U Jisu u la kyntait ia kata ka jingkyrpad kaba sniew bad ki paidbah ruh ki la isih ia u Jakob bad ia u Ioannis.

Ki nongialam niam/balang ha kine ki sngi ruh ki leh thik kumba la leh da ka kmie u Jakob bad Ioannis. Ngi ju iohi ha ki YouTube channel ba ki pastor, ki tymmenbasan, ki phadar, ki brother… ki pynpaw ia ka jingieit kyrpang tang ia kiba don hapoh ka kynhun niam jong ki. Haba ki kren ne ialap ki pynksan tang ia la ka jong, bad ki pynrem khyndiat khyndiat ia kiba don ha kiwei ki kynhun/niam. Kiba kum kine ki leh ia ka jingbha hynrei kaba kut ka poi sha ka jingsniew ba u Blei um sngewtynnad bad um lah ban pdiang kumba u la kyntait ia ka jingkyrpad ka kmie u Jakob bad Ioannis.

Sa lano keiñ ba ki nongialam niam/balang jong ngi kin sngewthuh ba ngi long mar kajuh ha khmat U Blei bad ha khmat ka mariang, bad ba U Blei u kwah ba ngin iaieit kawei ka niam ia kawei pat, kawei ka jaitbynriew ia kawei pat khnang ba ka jingsuk kan synshar ia ka pyrthei. Amen.