Lada phi ieit ia ka JAITBYNRIEW, kiar na kaba SHONGKHA khleh

Scholar Lawriniang, Nongthliew WKH

Kin don bun kiba pyrshah bad ki jingkynthoh ia kane ka jingthoh bad jingkren jong nga khamtam eh kito ki longkmie khasi jong ngi kiba la pyrshah lypa ia kane ka shongkha khleh kiba ym kwah ba kan long aiñ ha ri Khasi jong ngi. Hynrei ngan shu ong kita kiba pyrshah ki dei kiba ju ia boi lang ha ka juh ka jylli bad ki nongwei. Namar bapli ki la shah pyn matlah noh ia ka jingmut jingpyrkhat jong ki da ka bor kynsha aiu re aiu kaba napoh, kumta kim sngewthuh shuh bad ki la klet noh syndon ba ka shongkha khleh ka long kum ka jingpang bampong (Cancer) ia ka ri bad ka jaitbynriew Khasi hi baroh kawei, namar na ka jingshongkha khleh ngi shah knieh noh ia ka hok riti synshar khadar ha ka jaitbynriew jong ngi.

Ka Issue shongkha khleh ka la dei kawei na ki Issue ba la kham slem ha kaba ka District Counsil ruh ka pyrshah ia kane bad khamtam eh ha ka por ba i bah Shylla i long kum CEM ka Counsil i la ieng rangbah shisha ban pyrshah ia kane ka shongkha khleh ba kan ym ioh suh thied ha ri jong ngi, hynrei wat hapdeng ka jingpyrshah bajur bha ka Counsil ia kane ka shongkha khleh. Hynrei don katto katne ngut ki longkmie khasi kiba la tip bha ia ki aiñ ki la pyrshah kylla pynban ia kane ka aiñ da kaba ki leit ban dawa na u Lat ka jylla ha ka 31/7/2018 ba un nym soi (pass) ia kane ka aiñ shongkha khleh ba kan long aiñ ha ri khasi.

Haba ioh ban ia kren iatai bad ki katto katne ki riew khwan myntoi shimet ki ong, Hato ngim lah seh ban ieit ia u dkhar? Hato u dkhar um dei u briew? Balei phin shu pynbor ia ngi ban ieit ki Khasi? Katba ngi mon kein da ngi ieit iano iano ruh. Don kiba ong kham lah u dkhar u bsa hok u ieit hok u leh hok bad bun kiwei kiwei ki daw ba ki ai. Namar ba ki la long ki nongialeh pyrshah kumta ki sait ksan ha la ka jingsngewbha shimet. Hynrei tang shikyntien nga kwah ban ong, Phi lah ban ieit ia uno uno u ba phi mon ban ieit, ia u briew ne mrad ruh, tangba kynmaw na ka bynta ka jingsngewtynnad jong phi shimet wat pynlong ka jingkhie thma ia kiba bun ba lang hadien ha bud.

Kumba nga la kren haneng ba kane ka long ka jingpang bampong ba shyrkhei tam ia ka jaitbynriew, namar dei na kane kein u nongwei u ioh ban knieh noh ia ka riti dustur ka synshar khadar jong ngi, haba la ioh knieh ki nongwei kynmaw ba riti dustur khasi baroh kin sa jah lut bad hangta ngin sa duh jait wat ia ka kyrteng Khasi namar kin sa knieh lut wat ia kiei kiei baroh kiba don hapoh ka ri khasi. Kumta ia mynta hi ngam khang ia ka mon laitluid jong phi shimet ba phin ieit iano iano hynrei ngan shu buh tang ia kane ka kyntien ha khmat jong phi, ym tang ia ki kynthei hynrei kumjuh ruh ia ngi ki shynrang ka long: Lada phi ieit ia ka JAITBYNRIEW, kiar na kaba SHONGKHA khleh. Namar ha ka shongkha khleh ka rieh ka bih seiñiong. Wat die tad ia la ka jaitbynriew na ka bynta ka jingmyntoi shimet jong phi, U ta u bym kohnguh u long u ba isih, u ta uba kohnguh u long u ba ieit ia la ka jaitbynriew.

Khublei Shibun