Na Laitlyngkot sha Khanapara?’

Babu Kular Khongjirem

Ka jingsneng na ka kot Phawer u Aesop ka ong “Duk suk,riewspah, jynjar trah”.Kane ka jingsneng ka kham ia hap ha ki por hyndai ba dang hok ka pyrthei.Ha kane ka juk mynta pat,kane ka jingsneng kalong noh mar khong pong.Kiba duk ki jynjar trah katba kiba riew spah pat ki suk ki sain kynjai. Dang shen ka khubor ka mih ba,namar ka jingbym sngewthuh ia ki odd bad even number ba pynjari ka sorkar ia ki kali paidbah,ki briew ka thain Laitlyngkot ki leit shim dawai ia kiba pang bad shitom eh,hynrei ynda ki la poi ha Laitlyngkot,ki shah dain kuna ha ban jem jai artad.Nalor ba ki pan kylliang ban leit shim dawai,sa ka pan kylliang ban siew ia ka bai kuna kiba pli khlem don jingmap shuh tang khyndiat ruh na ki bor sorkar.

Ym tang katta,ki ba ha ing ha sem kiba leit sha ba iap briew ruh,ka sorkar kam don jingmap satia hynrei ka dain kuna beit naphang lin khlem don jing map shuh kat ka kam iap kam im ruh.Kaba kham sngew danda eh kalong, ba ia kato ka pisa bai dain kuna na kiba duk ba suk kiba mut ban leit shim dawai bad ka pisa ba ioh na kito kiba mut ban leit sha ing iap briew na Laitlyngkot, hana,ka sorkar ka ioh ban siew bad bei ia ka bai leit bai wan ne bai rel ne bai kali jong kito ki briew kiba wan phai sha la ka jong ka state na ki nongbah bapher bapher kiba don kylleng ka ri India.Ha ka jingshisha,kito kiba ioh lad ban shong ban sah sha ki sorbah ka ri India ki lah ban long kiba kham bit kham biang haba ia nujor bad ki briew kiba shah dain kuna ha Laitlyngkot.

Ka pisa ba shim bein bad dain kuna bein na kiba duk ba suk na Laitlyngkot ka leit na ka bynta ban suk ka leit ka wan jong kito kiba kham bit kham biang pynban na ki nongbah bapher bapher ka ri India.Lada kane ka dei shisha,ka jing pyrkhat briew bad ka mynsiem jingiatip lem para briew ka dei ban treikam ha ki paidbah ba la leh da kane ka sorkar ba synshar mynta. Mynta pat,ha kine ki khyndiat sngi, ki khubor ki saphriang ba ki nong iathoh ha Khanapara ki ia thok pyllein pyllein ia ka sorkar tang ban lait ban ioh leit iathoh sha Khanapara.

Baroh naduh ki heh sorkar haduh ki paidbah baroh ki lah ia tip lut ia kane ka jingjia.Ka dei ka jingpynkhein im im-peit peit ia ki kyndon ba buh ka sorkar.Ym tang katta,kine ki nongpynkhein ia ki kyndon sorkar ki la wan rah ruh ka jingpang iabit ne Covid-19 sha ri jongngi.Hato,ka sorkar kan leh kumno ia kum kine ki nong leh thok bad kiba iaid lait na ki kyndon ka ain?Ka sorkar kan kem bad set phatok ia ki?Hato kan dain kuna kaba heh?vNe kiei ki jaitbpynshitom ba ka sorkar kan pynshitom ia kine ki nongpyn khein ain? Ka jing leh thok rieh jongki ka la kylla long pynban ka jingtim(nong wanrah jingpang covid-19) ia ka ri jongngi.Ka sorkar ka dei ban pyrkhat khia bha ba ki briew kiba duk ba kyrduh bad ba lui lui (innocent people) ha Laitlyngkot ba ki leit donkam hok ia ka kam pang kam shitom bad ka kam iap kam im, ki duk ki suk ki shah dain kuna pynban khlem jingmap satia tang ban ioh siew ia ka bai leit bai wan kiba kham bit kham biang,katba ka kam leit jingiathoh pat sha Khanapara ka dei ka kam sngewbha bad kam khawai dawai rong.

Lada ym lah shuh ban map ha Laitlyngkot,hato, ka shong nia(justified) ia ka sorkar ba kan pyllait mon ia kiba leh thok pyllein pyllein sha Khanapara?Ai ba ki paidbah kin ia bishar lem ia ka dei ne ka lait ha kano ka rukom kane ka sorkar ba synshar mynta kan leh,la kan heh tang ka nia man ka sngi ha ki kot khubor,ne kan leh tyngeh shisha kum ka ktien kum ka kam?

Ngin sa iohi shai ynda la pyndep ia kata ka Magistrial enquiry ba la thung(instituted)da kane ka sorkar la ka long kam shisha ne ka kylla kam kai pynban ruh,ym pat lah ban batai ia mynta hi.