Sa 23hajar ngut duna, kiba ioh pang khlam corona ha India

Sa 22,752 ngut ki don kiba ioh pang khlam Covid 19 ha India, ha ki 24 kynta ba ladep bad kiba iap, ki long 482 ngut.

Haduh mynta, kiba ioh pang khlam corona ha India, ki la poi sha ka 7,42,417 ngut bad kitei ki kynthup ia 2,64,944 kiba dang shah sumar bad nangta sa 4,56,831 kiba la jem bad sa 20,642 ngut kiba iap baroh, ong ka tnat ka koit ka khiah ka sorkar India.

Ka khlam coronavirus, ka la nang kiew stet ha America, ha kaba ki don mynta 3 million ngut kiba don ia katei ka jingpang ha katei ka Ri. Katei ka jingpang ka kiew stet ha California, Hawaii, Idaho, Missouri, Montana, Oklahoma bad ha Texas. Ka jingpang ha Texas bad California, kiba dei ki Jylla kiba heh duh ha America, ka la poi sha ka shiphew ngut ha ka shisngi ha kine ki sngi bad tang ha Texas, ki nongpang, ki la kiew ar shah, ha kine ki ar taiew ba ladep.