Ngi im ha ki sngi mynta,
Jingsniew lah kiew rasong shisha;
Ka hok ka hot lah nangsynjor,
Ha nongkyndong kumjuh ha sor.
Jingshah thombor jing shah batbor,
Ki kiew sted Kat nangiaid ki por;
Haei burom ka Ri Khasi?
Jingsniew ki jia man la ka sngi.
Ki jingialeh ba mar kynti,
Ia ka ngi I bad ngi sakhi;
Ka jingshong shngain shi iing shisem,
Mynta lah eh shisha ban Shem.
Ka jingshongsuk bad ka jingkmen,
Ka lah nang jah na iing na sem;
Ki jingiakynad ki iai jia,
Ha ki longiing long sem mynta.
Ha kot khubor ngi juh iohi,
Kaba pynpar niangkhriat ia ngi,
Jingjia ba ngim juh khmih lynti,
Ki jia mynta ha Ri Khasi.
Sa katno pat ko Ri Khasi?
Pha dang iaileh ia ba ijli;
U Blei U iam namar jong pha,
Lano ka por ba phan kylla.?
Kan poi ka por ba ngin sa duh,
Jingieid U Blei ngin nym ioh shuh;
Hangta tang ka jinglyniar kthang,
Ba lad jingisnei ka lah khang.
Ko Ri Khasi kyndit bynriew,
To kiar ban leh ia Kaba sniew;
La ha sor ne ha nongkyndong,
Ba hok bad sot kan ieng rasong.
Ngan buh kawei ka jing kylli,
Ban pynpyrkhat ia nga ia phi;
Balei kumne ia Ri Khasi,
La nang iai jia tang jingijli??
Jingkitkhlieh ka jong phi jong nga,
Ka lah dei ba ngin shim mynta;
Ia hok ia sot ba lah duh noh,
Ngin wanrah biang ia ki baroh.

TRAI_IARAP_IA_RI_KHASI.

Amen

Lah thoh da U Mr. Mebanshaniah S. Marbaniang
Email. [email protected]