Siew ka KHADC T.8.4lak sha ki MDC rKim ai jingtip, shaei ki pynlut

Shillong,28 Risaw:
Ka bhah jong ka KHADC kaba dei ban ioh na ka khajna na Value Added Tax (VAT) jong u snem 2007-2008 bad 2008-2009, kam shym la poi sha pla jongka Council namar ba khlem ot ne khate ia ka VAT.
Katkum ka kaiphod jong u CAG, na ka bynta u snem ba kut haduh ka 31 tarik Lber 2008 ba la wanrah da u CEM Bah Adelbert Nongrum mynta ka sngi, ha ka dorbar tlang jong ka Council, ka la pyni ba ka Council kam shym la khate ia ka VAT kaba pynlong ia ka Council ban duh haduh T.8.06 lak na ki 155 tylli ki kam kontrak ha u snem 2007-2008.
Ka kaiphod jong u CAG jong u snem 2009 ba kut haduh ka 31 tarik u Lber ka la ong ba hadien ba la bishar ia ki jingthoh ka KHADC kiba iadei bad ka jingot ia ka VAT ka la pyni ba ka Council kam shym la khate ia ka VAT kaba la pynduh nong T. 13.45 lak na ki kam kontrak bapher bapher jong u snem 2008-2009.
“Ka VAT kaba T.17.01 lak na ka bill jong u kontraktor na ka jingtrei kaba T.181.40 lak la pynsep ei na ka bynta ban shna ia ka Byrnihat Market Complex” la ong ka kaiphod u CAG. Ka kaiphod ka la ong ruh ba ia kane ka kam la pyntip sha ka Council ha u snem 2012 bad khlem ioh jubab haduh mynta.
Ha u snem 2008-2009 ka District Council ka la mang tyngka T.5.60 lak na bynta ka Youth Affairs bad T.2.80 lak na bynta ka Arts and Culture. Katei ka mang tyngka ka dei kum ka jingiarap, na ka bynta ki 28 ngut ki MDC jong ka district council, ha kaba la mang ba uwei u MDC T.20,000 tyngka na bynta ka Youth Affairs bad T.10,000 hajar tyngka na bynta ka Arts and Culture ba kin ai sha ki nongioh jingmyntoi ha katei ka shisnem.
La bthah ruh ia ki MDC ban kin phah ia ki jingpynshisha ba ki pyndonkam ia katei ka pisa, hynrei ka CAG ripod ka la lap ba napdeng ki 28 ngut ki MDc tang 4 ngut ki la phah ia ka UC na bynta ka youth Affairs katba 3 ngut ki la phah na bynta ka Arts and Culture.
Ka CAG ka la ong ba namar ka jingbym lah ki MDC ban phah ia ki jing pynshisha na bynta ka T.7.30 lak tyngka ba dei ban ai sha ki 24 ngut ki MDC na ka Youth Affairs T.4.80 lak katba na bynta ka Arts and culture pat T.2.50 lak tyngka ym lah ban pynrung hapoh ka Audit, la phah ia katei ka ripod sha ka District Council ha u snem 2012, hynrei ym pat ioh kano kano ka jubab, ong ka kaiphod.