Mynta yn mad u Bah Adelbert kum u CEM thymmai ka dorbar KHADC

Shillong, 27 Risaw:
U Chief Executive Member (CEM) ka Khasi Hills Autonomous District Council (KHADC) uba dang shu shimti u Bah Adelbert Nongrum un mad ia ka dorbar hadien ba u la shim ia kane ka kam kum u nongialam ka Council.
U Bah Adelbert jong ka KHNAM u la shimti ia ka shuki CEM hadien ba u Bah Ardent M Basaiaw moit u la iehnoh ia ka hadien ba la shah kynthah ha ka UDP.
Ki liangpyrshah ba don ha ka lama ka KHUDA ba ialam ka Congress ki la pynkhreh ban wanrah ia ki mat ban thalain ia kane ka Executive Committee synrop lang kynthup ka UDP, ka HSPDP bad ka KHNAM nalor ka MDC shimet ka Kong Grace M Kharpuri kaba dang shu phet na ka party. Ki liang pyrshah ki la pynkhreh ban ther ia kane ka EC halor ki mat kynthup ban pan jingshai ia ka jingwan kynduh ia ki paidbah ka thain Umwang ka ri-Bhoi kaba don hapdeng ka jingiakajia bad ka Assam, ka jingthungkam jong ka EC kaba rim wat hapdeng ka jingkam ba duna pisa bad ka jingbeh kam ia kiwei pat.
Hynrei na ka thymmei khubor na ka KHUDA, la sngewthuh ba kim nym wanrah ia ka jingbym shaniah ia kane ka EC namar ba ki dang peit siar shwa aiu kan leh ha kine ki sngi.
U CEM u la ong ba ki EM kiba don ha ka EC ba mynshwa, kin neh kumjuh ha kane ka kynti bad ruh ia ki tnad ba ki bat ruh kam nym don ka jingpynkylla.
La ioh jingtip ba ka KHUDA hynne ka sngi ka la pynlong ia ka jingiakynduh lang jong ki MDC ban iapynkhreh na ka bynta ka dorbar kaban sdang lashai ka sngi.