Kiba shah kem na Lawmali dei ki buaid, ong u SP

Shillong, 27 Risaw:
Katkum ka jing tohkit jong ki pulit ki san ngut kiba shah kem na Lumjingtep Lawmali ha ka miet 18 tarik Risaw por 10:30 baje janmiet kim dei ki nongpynpra lumjingtep hynrei kidei tang ki nongdih kyiad kiba shu ialeh shongshit.
U SP ka East Khasi Hills u Bah M Kharkrang u la iathuh ba kitei ki san ngut ba la kem ha katei ka sngi ym pat lah ban pyn shisha la ki don bynta ne em ha ka jingpynpra ia ki Lumjingtep.
U la ong ba na ka liang jong ki pulit ki dang pynlong ia ka jingtohkit ia kitei ki san ngut ban lap ia ka jingshisha. U la ong ba katkum ka jingtohkit kaba dang iaid mynta, ka pyni ba kitei ki briew kim dei kiba ju donkti ban pynpra ia ki lum jingtep kumba la jia ha kylleng ki jaka jong ka nongbah bad ban leh sang ruh ia ki diengphna.
Ki san ngut ba shah kem la tip kyrteng kum u Rapme Dkhar 22 snem na Nongrim Hills, Brandon Jyrwa 21 snem na Jaiaw Laitdom, Rapheal Wanniang 21 snem na Upper Mawprem, Kyrshanlang Ryntathiang 19 snem bad u Ferdinand Massar 35 snem na Mawlai bad baroh ki dang don ha kti jong ki pulit.