Ki Sngi ba la leit noh (Na ka bynta ki Class X)

Babu Kular Khongjirem

(ba bteng) Ha ka dkhot kaba lai(dk.3) pat,u myllung u kynmaw tympang ia ka shnong Sohra jongu ha ka por lyuir ba jur bad ther bha u ‘lap bah Sohra.Ka dkhot ka sdang da ki kyntien’Ki tmier jong ka ruh……Te ka ri War ka win bad ki sawa ki maw’.Ki ‘tmier’hangne ka mut ki tmier jong ki riat kiba don sawdong jong ka shnong Sohra.

Ha ka por lyiur ba jur bha u slap,u myllung u kynmaw ba ki tmier jong ki riat Sohra ki dap bad shlei shait da ki um bah kiba tuid na ka um slap bad kine ki umbah kiba tuid bad shlei miar na man la ki tmier riat ki hap bad tuid sha ki lyuh ban pynlong ki wah bah wah san ha thain Sohra bad poi pat sha duh ri thor ka Bangladesh.

Namar ka jingheh jong ka um,ki wah ki tuid da ka jingkyrhuh bad byrngem lyngba ki lyuh wah ba ki tuid arsut.Hynrei ynda la poi ka por synrai pat,ka Sohra ka dei ka shnong kaba pyngngad shibun bad ka lyer batesi-batemon ki beh hir hir ha ki lum ki them jong ka thain Sohra. Don ruh ki por ba u myllung u ju leit kai pyngngad sha lum sha wah bad sha khlaw sha btap.U shoh mynsiem bha ia ki jingkynjah bad jingitynnad ki khlaw bad ki lum ki wah.Don ruh ki por ba u poi leitkai shaduh kham sharum ka shnong Sohra kaba la iohi shynna bha kyndiang ia ki them ka thain ri War(ki thain Sohbar,Wahlong Mawlong,etc).

Ki briew ka thain ri War ki dei ki briew kiba trei shitom bha baroh shi snem lynter.Ki trei ym tang ha ka rep ka riang jongki hynrei ki thoh bad pom ia ki dieng kiba heh bad ba rit kunjuh.Ki trei ruh ki kam shoh bad shain maw ha ki par maw bad par mawshun sha kito ki thain.Kine ki jingtrei jong ki briew sha ki thain ri War ka la pynkhih win ia ki khlaw bad ka jingsawa jong ki mawvba ki shoh bad tih kiba don kylleng ka thain ri War. Ha ka dkhot kaba saw(dk.4) pat,u myllung u kynmaw ia ka jingleit shnong jongu teng khat mynno re hadien ba u la jah bun bun snem na la shnong..Ka dkhot ka sdang da ki kyntien ‘Na ki kur bad ki lok……Sa shisien,sa shisien,ki phalang pat ha nga’.Hadien ba um ju poi shnong shuh bun snem namar ba u la sah beit ha Shillong(ba u hikai skul ha Goverment Boys’High School,Shillong),u myllung u shoh mynsiem bad lyngngoh bha namar ynda u la wan bad poi biang ha shnong,don bun kiba ha ing ha sem,ki lok ki jor bad ki para shnong para thaw kiba ju ia im bad sah ryngkat bad u ha kito ki por ba u dang khynnah kim don shuh na kane ka pyrthei.Don pat kiba dang im bad dang sah ha kane ka pyrthei tangba ki lah ia tymmen bha kum ma u hi.Hynrei u kynmaw pat ba ka shnong Sohra ka la wanrah ia ka nam ka burom hi baroh kawei habka ri jongngi namar ka dei ka shnong kaba jur tam eh u slap ha pyrthei.ki ‘duriaw rupa’ka mut ia ki umbah Sohra kiba lieh shait kum ka rupa bad tuid sha ki pynthor ka ri Bangladesh.Ka ktien ‘phalang pat ‘ka mut ki jingkynmaw tympang biang u myllung ia kiei kiei ki jingjia kiba la pynsngew bynnud bad pynpang nud ia jingmut jingpyrkhat ha ka jing im jong u.U kwah bad angnud namarkata,ba, sa shisien pat un iohi bad ioh mad biang ban lehkmen kum u khynnah ha shnong Sohra.

Khadduh khadwai, u myllung um lah shuh ban kynmaw lut ia ki jingjia kiba pynsah jingkynmaw ia u ha ka por ba u dang khynnah ha Sohra.Katba u nang kynmaw ia kawei ka jingjia,ka wan shuh sa kawei pat ha ka jingkynmaw jongu.Kine ki jingjia ia ki sngi ba rim jongu ha Sohra ki nang tyllun bad nang tyllun bad nang bun nang bun bad ki nang shlei nang shlei haduh ba um tip shuh kumno un sdang bad kiei pat un pynkut.Hynrei,u phla khadduh ba,u kwah bad angnud biang sa shisien sa shisien ban long u khynnah ban ioh mad biang ia kito ki jingjia ba sngewbang bad sngew muja ha ka por ba u dang long u khynnah ha shnong Sohra.Ngi lah ruh ban ring jingmut hangne ba,u myllung u pynpaw kumba u kham sngewtynnad ban shong ban sah bad ban im ha ki nongkyndong ba dang khuid ka mariang(naduh ka lyer,ka um,ki khlaw ki btap bad ki jinglong shi sur ki briew)ban ia ka jingim ha sor kaba la khap ngiah lypa bad dap tang da ka lyer jaboh suda bad ki jait briew ba bun jait ki jinglong kiba don kylleng sawdong ka sor Shillong. [yn dang bteng]