Kiew ka bai ding, ba leit lum jingkhein, da kito kiba dang shah hikai

Shillong: Myn hynnin ka sngi ka Hyniewtrep National Youth Front (HNYF), ka la leit ban iakynduh ia u SDO E MEPDCL ha ophis treikam jongu, kaba don ha IGP Shillong ban pan jingpynshai halor ka jingkiew jong ka bai bording kaba la kiew shaba palat pud ha baroh kawei ka sor Shillong bad kumjuh ruh ha ki thaiñ nongkyndong.

Ha ka jing iakynduh jong ka seng bad u SDO, u la pynpaw ba ka jing bakla ka dei napoh ka ophis treikam lane ka (Main Office) namar ba ki la bthah ba kin leit lum jingkhein ne thew meter, da ki nongtrei kiba dang hapoh ka jinghikai (under training) bad dei halor kane ka daw ka sa kiew ka bai bording shaba palat pud.

Na ka liang u SDO ka MEPDCL u la ong ruh ba lada don ki paidbah kiba ioh pdiang ia ka bai bording ka bym iahap satia bad ka rukom pyndonkam ia ka bording ki lah ban ia kynduh bad u, da kaba rah ia ka kot bai bording khnang ba un phah pynbeit marmar ia ka jingeh jong ki paidbah.

Halor kane ka seng ka pynpaw da ka jingbitar ia ka jingleh thurmur jong ki nongtrei jong ka MEPDCL bad shen ha ki sngi ban wan ka seng kan sa ia kynduh bad u myntri ba dei peit ia ka tnat bording ban dawa bad pynshitom ia ki briew kiba donkti ban leh thurmur ia kane kam.