Plie tang ki hotel, ym pat shah ia ki homestay bad ki guest house

Shillong: U bah Prestone Tynsong, Symbud Myntri rangbah ka jylla ha ba iakren bad ki lad pathai khubor mynta ka sngi u la iathuh ba ka sorkar jylla ka la shah ban plie tang ia ki Hotel kiba don ha Nongbah Shillong,Jowai bad Tura.

U la ong ruh ba ka sorkar jylla kam pat shah ban plie ia ki Guest House, ki Homestay bad kum juh kam pat shah ban plie ia ki jaka jngohkai ha ka jylla baroh kawei. Ha ba pynshai halor kane ka phang, na ka liang u bah Prestone u la iathuh ba ka jingshah ban plie ia ki Hotel ha Shillong, Jowai bad Tura ka long namar ba ki don na ki briew kiba leit donkam na ka wei ka district sha kawei ka district kim ioh jaka ban sah.

Kumta na ka liang ka sorkar jylla ka la shah ban plie tang ia ki Hotel, hynrei ia ki Guest House, ki Homestay bad ia ki jaka jngohkai ha ka jylla baroh kawei ym pat shah ban plie.