LA I SHAIONG

P.B.S

[ba bteng] “Kaba nga mut ban ong ka long ioh u pom daw shathie kein” pynshai u kpa.

“Ngam ngeit phi kpa ba u Kynsai un long kumta” ong ka kmie bad ka wiat rymmuin.
“Ban ia ka dkhar hi te ngam treh tdot” ong ka kmie ha ka sur kaba kham heh.

“To wat bun jingmut than phi mei” ong ka khun. “kynmaw ba ka dei tang ka jingphohsniew” iarap pynshai ka khun kaba la kham nang kham stad.
“Ka dei kaba ong ka khun” mynjur u menkpa.
“Ban sting ka jingpyrkhat jong phi mei ka bha ba phin phun shibit ne lashai” ong ka Banrilang.
“Ka dei khun. Ngan kylli beit ha doh” ong ka kmie.
“Ha… ha… ha” la ia rkhie lang ka khun bad u kpa.

“To ngin ia pur noh shawei shawei ynnai ia ktaid ia kajuh” ong u kpa.
“Ka juk internet mynta te kmie, ngi lah ban iohi lut ia ki bynta bapher bapher jong ka pyrthei” ong u kpa.
“I Hep lei iba kyrni mobai te ynnai iakren shuh” ong ka Banrilang.
“Phi i wat ka kam kha kam man ruh la shu shalai ha kane kumba shalai ia u shyiap” ong u kpa.
“Ta ka daw ki rangbah briew khamtam ki tymmen ki ong ‘la i shaiong’ ia kane ka juk” bynrap biang u Kpa.
“Da ym tip kyrteng ruh tang ban tip u nombar phun lah biang palat bad ka kam ka la iaid shaid-shaid. Ha kiba lyngkot jingmut jingpyrkhat bad tlot ka bor pyrkhat lah long kumba shong soh-padoi, poi shane shatai” ban biang u Kpa bad u rkhie artat.
“I Pa iba nang phi” ong ka khun.
“Hooid, kein ka dei. Nga mut ban ong ba phi nang pyndait ktien” ong ka khun.
“Uto u Rangsan um pat wan ne?” kylli ka kmie.
“Tharai im pat wan phi mei. Da i lah wan lah iohi hi kein” ong ka khun.
“Phun noh ei ba un wan noh. Ka khynnah kaba heh tang ka shang” kren dom ka kmie.
“Katno baje ko mynta? ong ka khun bad ka peit artat ia ka baje iing kaba heh ba long rongstem.
“Hu ….. dang 9 lah lah 10 minit” ka ong.

“To ieh un wan hi dang katta ruh” ong u kpa bad u ieng ban leit shabar.
U Kpa u pule kai noh da ki kot khubor. Ka Banrilang ka sar ia ka kamra shetja, kamra shongkai bad kamra thiah. Ka kmie ka shu khoh byrngia noh da u kwai ban bam ha ka sngi kaba bud.
U Rangsan teng khat eh u lait na ka jingshah khnium ha la ka kmie. Ka kmie ka iai khnium shi iai khnium namar u kyrni eh ha la mobai. Kam ju don hi bad teng khat eh ba u buh ia ka mobai hynrei borabor la iohi ia u ear-phone ha shkor ba u sngap jingrwai. Da la ngiah ka sngap sa ka ialehkai. Ka jingshah tim ha la ka sngi ha la ka sngi ka la shu kylla myllen noh ha u.
“Dei ba u leh khun khadduh tharai” ong u kpa. [yn dang bteng]