Tuklar lut ka BJP, ia ka NPP ha Manipur

Bah Monarch Shabong

Ha kat kane ka jing jubor jong ka khlam ha ka nongbah Delhi, hynrei ki nong ialam ba ha khlieh jong ka NPP, ki la her bran sha Delhi, ban ia kynduh ia U Amit Shah, uba dei u nongialam ba ha khmat jong ka seng BJP bad na ka bynta katei ka jingleit u Conrad Sangma, myntri rangbah ka Jylla, ula ieh noh ia la ki jong ki kam ki duk, kum u myntri rangbah jong ka Meghalaya, ban leit synran ia kitei ki 4 ngut ki MLA bad kata ruh, ba la ialam da uwei u minister jong ka Assam, U Himanta Biswa Sarma, ha kaba ka kyrdan jongu, ka kham rit ha ka sorkar ban ia U Joy Kumar Singh, uba dei u symbud myntri rangbah barim jong ka Manpur.

Na katei ka jingleit ka paw shai hangne, ba ka BJP, ka khlain bor shi katdei, ha kaba U National President ka NPP, uba dei u myntri rangbah ka Meghalaya lem bad ki 4 ngut ki MLA jong ka Manipur, ki hap ban leit iakren ia ka jing ia shrut jong kitei ki ar seng (lane kaba dei ka kam iing jong ka NPP), ha khmat ki heh duh ka BJP. Katei ka nuksa, ka la iaid ha Manipur bad ka la nang iaid ha Meghalaya ruh, namar ba U bah AL Hek, myntri ka sorkar Jylla, ula tyrwa ha ki khyndiat sngi ba ladep, ba un ialam hi ia ki dkhot jong ka seng HNLC, ban iakren bad u myntri kam poh iing jong ka sorkar India bad um shym kren eiei satia ia ka jing mynjur jong u myntri rangbah ka Jylla.

Kam dei tang katta, hynrei katei pat kam dei shuh kaba phylla, namar ba ngi iohi, ba kine ki myntri jong ka sorkar NPP, ki MLA jong kane ka sorkar synrop, ba ki la ju mlien hi ban leit sha Delhi, ia man ki kam ba ki don bad nangne shakhmat, namar ba ngi ioh sngew ba ka don ka jingiakren ban ia bujli myntri ruh, la imat, kumba ka miej iakren kan dei hi sha Delhi bad lehse, ka thup jong ki myntri thymmai ruh, ioh kan mih pynban lyngba ka jingmynjur ki heh jong ka sorkar na Delhi.

Ngin dang ia peit ia kaei ka ban jia ha ki khyndiat taiew ban sa wan, namar ba ka UDP, BJP, PDF, ki shu leit thaw sorkar lang da ka jing bym dap briew lane lehse, ha kaba ngin shu ong ba ka dei ka jing bym banse; hynrei lada ki dak ki shin, ki kdew ia kaei kaba ki la dep iaid ha Manipur, kumta khlem pep, ngin sa iohi, ba ka BJP na Delhi, kan dei ka bor ba ha khlieh duh, halor ka iaid ka ieng bad ka jing treikam jong kane ka sorkar MDA.