Rev. B.P. Pohsngap
Ha ka jingiaid lynti ka jingim briew yn nym don ba lait khlem da iashem ia ki jingeh, ki jingsngewsih kiba ban khia ha ka Jingim. Kine ki dei ki jingbuh beit jong U Blei, ba lyngba da ki, yn lah pat ban tip ban sngewthuh ba yn nym don ki jingeh ne jingsngewsih ki ban nym kut noh, la ka shim por katno katno ruh. Ki don ki jingjia kiba shim por da ki bnai, ki snem lane da ki phew snem haduh ba ym shym lah shuh ban ia ithuh iwei ia iwei pat.
Kum U Joseph bun bun snem ki hynmen jong u kim ithuh shuh ia u. ka kitab Jenesis 42:8. “Bad u Joseph u da ithuh ia la ki hynmen, hynrei ki kim shym ithuh ia u.” kane ka paw ba ka jingiaid lynti ba neh slem ka jingsngewsih ha U Joseph da ki phew phew snem. Ki don pat ki jingeh ne ki jingsngewsih kiba donkam kyrkieh ban ioh noh ka jubab ne ban kut noh ka jingsngewsih. Ha kane ka jingjia jingsngewsih ba ngi iakren mynta, ka dei ka sngi kyntiew kurim kaba don burom eh bad lehse kan dei ka jingkyntiew kurim kaba khraw tam ha ka pyrthei, ha kaba ka Mary ka kmie ba ieit eh U Jisu ka don ryngkat hangta – Ioan 2 : 1… “Bad ka kmie U Jisu ka don hangta”. Ka longing ha kana Galilaia, kaba ki la don ka khun kaba don burom kaba nang ban niewkor ia ka long kha long man ban wanrah ia ka burom ka long ing longsem. Hadien ba ki la pynbeit ia ka sngi kyntiew kurim bad ia ki briew ban khot sha kata ka jingkhawai, bad lehse kan dei ba na ka list kyrteng briew, la buh kyrpang ia U Jisu bad Ia ki synran jong U ban khot ba kin ia don lang. ka Gospel U Ioan 2:2 ka ong “la khot ruh ia U Jisu, bad ia ki synran jong U de, sha kata ka jingkhawai shongkurim”. Ha kane ka khubor ka jingkhawai shongkurim to ngin peit bad ngin puson kiei ki jinghikai kiba ngin ioh :-
(1) Ka wan ka jingjia kaba kum ka ing kam shym khmih lynti.
Katba ka jingiakmen jingiasngewtynnad ka dang shongshit bha kyndit ki nongsam ia ka wain ki shem ba ka la lut noh. Kum ki nongsam- jingbam ki la sngewlehrain, ym don pyrthei shuh namar ba ki dang bun kiba dang ap ban ioh dih. Kum kane ka jingjia lehse ka ju wan, ne kan wan ha kano kano ka por, phi lah ban mad phi lah ban sa mad ha kano kano ka por, ka jinglehrain ka la wan ka jingkhuslai ka la tap, ka dum ka bneng ka khyndew ha ki jingmut jingpyrkhat baroh.
(2) Ka longkmie kaba don ka mynsiem sngewlem.
Ka Mary kaba don hangta, ka la sngewsynei, ka la sngewsihlang ia kata ka jingiashem jong kata ka longing. Ki don ki briew ha ki jingiashem ki longing longsem ha ki jingsngewsih ba wan ha ka jingim ha ka jaka ba kin sngewsynei, ki kren bein, ki iathuh khana sniew, kim sngewsynei, ki kren bein, ki iathuh khana sinew pynban sha kiwei kiwei. Peit ia ka nuksa ka Mary haba la lut ka wain, ka la leit iathuh ha U Jisu. Ka dkhot kaba lai ka ong “Te haba la lut ka wain, ka kmie U Jisu ka ong ha U , kim don wain shuh”. Kum ki longkmie kum ki kynthei haba phi iohi ia ki longing longsem ba shem jynjar, ym dei , ne ym bit ban lorni ne iathuh khana sinew sha kiwei, leit sha U Jisu leit sha U Blei duwai na ka bynta kito kiba ban ka jingsngewsih ha ka jingim jong ki, kata ka dei ka mynsiem Khristan ba shisha.
(3) Kaba pdiang ia ka Jingai jingmut ka beh krat ia ki jingsngewsih baroh
Hapdeng ka jingkulmar bym don wain shuh, ka Mary ka la leit sha ka jaka ba don ki shakri, khlem artatien ki shakri ki la iarieh sha kyndong ba sngewlehrain. Ka Mary kaba tip bha ia la u jong u khun, uba don ka bor, uba lah ban iarap, ban wallam ia ka jingkmen ha ka jaka jong ka jingsngewsih. Ka dkhot kaba san ka ong “ka kmie jong U ka la ong ha ki shakri, ia kaei kaei ruh kaba un ong ha phi, phin leh kein”. Hangne ngi iohi ia ka jinglong ki shakri ba ki long ki briew kiba stad, “ kaba sngew bad kaba leh”. U Jisu U ong ha ka Gospel U Math 7 :24. “Te mano mano baroh uba sngew ia kine ki ktien jong nga bad uba leh ia ki, ngan tharai ia u kum u briew uba stad, uba la tei ia ka ing jong u halor u mawsiang” ki ktien ba ka Mary ka kren ia ki shakri, ki la sngew, ki la kohnguh bad ki la leh ia kaei kaba U Jisu U ong. Ka dkhot ba hynniew Ioan 2:7 ka ong, “U Jisu U la ong ha ki to pyndap ia kita ki khra da ka um, Te ki la pyndap shoin ia ki”. Ka Jingkohnguh ka wan rah ia ka kambah, ka weng noh ia ka jingsngewsih jingkhuslai baroh. U Jisu u la phah tong ia kata ka um ha u khra bad kata ka um ka la kylla long ka wain kaba kham bha ia kaba nyngkong. U nongsynshar u bym tip u la ong “kumno phi tyngkai ia ka wain kaba bha haduh mynta.”
(4) Kaba kohnguh ban leh ia ki ktien U Jisu ka wallam Jingkyrkhu
Ngi la iohi ia ka bor kaba pdiang ia kaba ai jingmut ka Mary bad ia kaba bthah U Jisu ia ki shakri kaba la wallam ia ka jingkmen ha ka jaka jong ka jingsngewsih. Ki nongtong dohkha ruh kiba la kylla long ki synran U Jisu ha kawei ka por ha ka pung Genesaret, ki la ia tong dohkha baroh shimiet hynrei khlem ngat ei ei. Ka Gospel U Loukas 5 :1 – 7. Ka iathuh “U Simon U la iathuh bad u la ong, ko kynrad ngi la ialeh shitom baroh shimiet, te ei ei ruh em ngim shym la ngat: hynrei Namar ka ktien jong Me, ngan pynhiar ia ki jar. Kumta ynda ki la leh ia kane ki la ngat bun bah eh ki dohkha, ki jar jong ki te ki la sdang kad”.
Kaba khadduh bad kaba pynkut, kumno lada ngim kohnguh ia kata ka Jingai jingmut ki briew jong U Blei lane ba kyntait ia ka ktien U Blei. Ka kitab ba nyngkong U Samuel 12:15, “Hynrei lada phin nym sngap ia ka ktien U Trai, hynrei phin ialeh pyrshah ia ka hukum U Trai; kumta ka kti U Trai kan long pyrshah ia phi kumba ka long pyrshah ia ki kpa jong phi”. Lada ka kti U Trai kan long pyrshah ia u briew uei pat u ban dang lah ban iarap, ym don , ym don shuh. U Apostol Paul u ong ha ka shithi sha ki Ephesos 5:6 “Namar na ka bynta kine kiei kiei ka jingbitar U Blei ka wan ha ki khun ka jingbym kohnguh”.
Parabangeit, para Khristan baroh to ngin long ki briew kiba kloi ban leh ia kiei kiei kiba U Jisu U la ong ia ngi ban leh, khnang ba ngin mad ia ka jingkmen wat Hapdeng ki jingsngewsih
………….AMEN……………….
Ka burom I’U Blei ha kiba jrong tam eh.