Bym lah siew tulop, thmu pyn shongthait ka tnad shna iing 39 ngut ki nongtrei

Shillong, 24 Risaw:
Ka tnad shna iing ka sorkar jylla ka la phah ia ka jingtyrwa sha ka sorkar jylla ba kan thaw ia ka Voluntary Retirement Scheme (VRS) ban pynshong thait mon sngewbha ia ki 39 ngut ki nongtrei ka Housing Board namar ba kam lah shuh ban siew tulop. La 15 bnai ki nongtrei kane ka tnad ki khlem ioh tulop kaba la buh jingeh ia ki.
“Ngi la dep phah ia ka jingtyrwa sha ka sorkar na ka bynta ban pynshong sngewbha ne VRS ia ki 39 ngut ki nongtrei namar ba na ka liang ka tnad kam don pisa nalade ban siew ia ka tulop bad kiwei ki jingai”, la ong ka director ka tnad shna iing ka Kong Rosett M Kurbah haba kren mynta ka sngi sha ki nongthoh khubor.
Ka la kdew ba ka tnad kam lah ban siew ia ka tulop jong ki nongtrei la 15 bnai.
“Ngi la kyrpad ia ka sorkar ban bhah pisa ban siew noh ia ka tulop jong ki nongtrei hynrei haduh mynta ngim pat ioh kano kano ka jubab na ka sorkar”, la ong ka Kong Kurbah.
Ka la iathuh ba ka sorkar ka ju ai pisa T.15 lak man u snem ia ka tnad, bad kane ka long kaba rit ym dap tang ban siew ia ka tulop jong ki nongtrei kaba donkam T. 12 shi bnai.
“Namar kane ka daw ka tnad kam shym la lah ban siew ia ka tulop jong ki nongtrei”, la ong ka Kong Kurbah.
Ka la iathuh ba ka tnad ka pynmih pisa tang na ka sut jong ka skhim shna iing ba ai sha ki briew kiba duk bad kane ka kut noh tang haduh u snem 2000.
“Kam ju don shuh ka jingpynmih pisa hadien u snem 2000 ba ka sorkar ka la pynsangeh noh ban ai ram shna iing”, la ong ka director.
Katkum ka kaiphod jong u CAG, kane ka tnad shan iing ka pyndonkam haduh T. 22.13 klur ban siew biang shi bynta ia ka ram jong ka ram ba la shim bad ban pynlut ia ki jingdonkam.
Ha u Jymmang 2000, ka sorkar ka la pynsangeh ban snageh ban ai ram thymmai ban shna iing.
Shwa ia kane na ka liang ka seng jong ki nongtrei kane ka tnad, ka Meghalaya State Housing Board Employees Union (MSHBEN) ka la pan ia ka jingtuklar jong u chairman ka Public Accounts Committee (PAC) u Bah Hoping Stone Lyngdoh ban iasaid ia ka sorkar ba kan pynlait noh ia ka tulop kaba sah 15 bnai.
“Kane kam dei ka sien ba nyngkong ba ngim ioh ia ka tulop, shwa ia kane, ka tnad kam lah ban siew ia ka tulop jong ngi san bnai naduh u Nailur 2012 haduh u Kyllalyngkot 2013”, la ong u general secretary ka MSHBEN u Bah D Lyngdoh ha ka dorkhas ba la aiti ha u chairman ka Public Accounts Committee (PAC).
Namar kane ka daw, ki nongtrei ki la syllang haduh kim lah siew bai iing shuh, ki shem shitom ban bsa ia la ki khun bad ban pyndap ia ki jingdonkam ha iing ha sem.
Na ka liang u chairman ka PAC u la kyntu ia ka sorkar ba kan pynlait noh ia ka tulop jong ki nongtrei kane ka tnad shna iing kloi.