Sa arngut ki shipai, ki ioh pang khlam coronavirus ha Shillong

Shillong: Sa arngut ki shipai, ki ioh jingpang khlam Covid ha Shillong, ong U Conrad Sangma, ha ka peij jongu ha ka twitter.

Lyngba ka jingdon sa kitei ki arngut ki shipai, kumta kiba ioh pang baroh, ki la poi sha ka 50 ngut bad ki don 7 ngut kiba dang shah sumar mynta.

Ha kawei pat ka khubor, la iathuh ba U bah AL Hek, myntri ka koit ka khiah, u ong ba kitei ki arngut ki dei ki shipai BSF bad la iathuh ba kitei ki la ioh pang hynnin ka sngi. Kham mynshwa ruh ula don uwei u shipai BSF, uba ioh pang covid 19 hi.

U bah Hek, haba kren ha ki kotkhubor, u iathuh ba uwei na kitei ki shipai, u dang shu wan phai na Haryana, ha ka 26tarik Jylliew 2020, katba uwei pat u dei u nongniah kali, uba ju kit mar ia ki shipai na Assam sha ka ktem jong ki shipai BSF ha Shillong.

U bah Hek, u ong “Baroh arngut kitei ki shipai, ki dei ki bym shym la pyni dak satia, ba ki don jingpang bad mynta, ki don ha ki jaka sah ba kyrpang jong ki shipai BSF”.