Ah! Ko Ri Lyngngam baieit

La thoh da u Ex.Rev.K.Langrin, myllung ka Ri Lyngngam

1.Ko Ri Lyngngam baieit jong ngi,
Pha don ha tduh ka Ri Khasi,
Ka spah barieh don lut ha pha,
B’la peit jawdud d’u bar jylla.

2.Ka shnong Shallang dei shnong donnam,
Ka ïew donnam ka Ri Lyngngam,
Mynder u thap man la ka sngi,
Ïa spah jong pha ban kjit ma ki.

3.Ka ïew Shallang la shah khang dam,
Naduh ba bna jingwan ka khlam,
Ynda la plie wat kheiñ pahuh,
Ï’u corona phin ia tyngkhuh.

4.Haba la plie sa i’u dewiong,
Ki bar jylla ki wan nyngkong,
Khlem pep kine kin wanrah khlam,
Husiar, ko khun ka ri Lyngngam.

5.Jingjia ha shnong Ichamati,
B’la shah pyniap u khun Khasi,
Ai ba kan long ka jingmaham,
Ï’u khun Khasi ha ri Lyngngam.

6.Trai shnong Shallang ki die madan,
Ki dkhar pat ïing paki dulan,
Sangsot ki khun Lyngngam jong ngi,
Ki shah kren beiñ h’u mynder ri.

7.Ko khun Lyngngam, nga ong ia phi,
Hawto! Phi nud saham ia ki?
Mynder u la kham bun ia ngi,
Haba nangbun ki phaktori.

8.Ka por dang don ban kyndit briew,
Da sur myllung ba ngan kyrsiew,
Ko khun Lyngngam, nga ong ia phi,
Ïoh jia kum ha Ichamati.

9.Ynda la iap uwei arngut,
Ba phin babe kam don jingmut,
Ka bha ba phin leh noh mynta,
Kum i’u Arbi Gurung mynshwa.

10.Jingbun ki Nepali mynshwa,
La kat jingdon ki trai jaka,
Naduh ba iap u Boss jong ki,
La stait syndon ki Nepali.

---

Ko ki samla ka ri Lyngngam, nga la pyllait ia kane ka poetri ha shwa jong ka jingwan ka khlam. Kane kaba mynta ka la kham jrong bad kham bha ban ia kaba mynshuwa. Sa peit, katno ngut ki ban kynthoh sniew biang ia ki Lyngngam kumba la kynthoh da uto u briew mynshuwa.

Ki nongshong shnong ha ri Lyngngam kim dei tang ki Lyngngam. Hynrei ki don ruh ki Nongtrai, ki Dikir, ki Maram, ki Muliang, ki Garo, ki Bhoi, ki War, ki Mawiang, ki Pnar,…Mynta, ka jingwan rung kyrthlep ki bar jylla ha ki karkhana shet dewiong, ha ki par dewiong bad ban seng dukan ha Shallang bad ki shnong ba marjan, ka la long ka jingma ia ki trai jaka. Kane ka jingrwai jong nga ka long ka jingkyrsiew ia baroh ki khun khasi ba shong ba sah ha Ri Lyngngam ba ngi dei ban long kiba stad bad husiar bha.