T.1,000, shongdor kawei ka dieng kait ha ka Diwali

Shillong, 23 Risaw:
La iohi ba ha manla ki dukan khar kaia la ha Iew Mawlong ne ha Khyndailad la pynriam pynbeit ban pyniphuh iphieng da ki jingthaba jong ki rong ba bun jait, kum ka jinglehkmen Diwali ki niam Hindu. La iohi ruh ia ki khilon kiba la shna pynwan dur da ki pashor kait bad ki ‘la kait ban rung sha ki dukan.
La iathuh da katto katne ngut ki briew ba ha katei ka jingpynriam pynbeit ia kitei ki ‘la kait la shi thied na ki jaka nong kyndong ha ka dor kaba heh, ban pynthikna ia ka dor ki pashor kait ba ki niam hindu ne ki khar Kaia ki la thied u Rupang u la ioh ban ia kren bad katto katne ngut ki trai dukan kiba dei ha ki dukan heh.
Ha katei ka jing iakren ki trai dukan ki la iathuh ba ki thied ia kitei ki pashor kait ha la ki jong ki jong ki dor, ki la iathuh ba kawei ka pashor kait kaba jrong lymphuin ryngkat ki sla kiba itynnad kiba khlem thohrew bad ki bym pait sla bad kaba heh pyllun ka shong dor haduh T.500 bad T.600 tyngka, katba kiba kham rit pat ki shong dor T.300 tyngka kawei.
Haba ia kren bad u Manager kawei ka dukan suh jain ka Jain Fabrics kaba don ha Motphran u la iathuh ba u la thied ia ki ar tylli ki pashor kait jong u ha ka dor T.500 tyngka ar tylli, ki dei ki pashor kait kiba rit bad kiba lyngkot.
Haba iaid kylleng ka iew duh bad Khyn dailad, u nongthohkhubor u la ioh jingtip ba ka dor jong ka pashor kait ka kham rem ha Khyndailad ha kaba la iathuh da ki trai dukan ba kaba kham itynnad bad ka jrong heh pyllun bad kaba iar rynjup ki sla ka poi haduh T.1000 tyngka kawei, katba ha Iewduh bad Iewmawlong pat ka pashor ka dor ka pashor kait ka poi hapoh ka T.600 tyngka.
U nongthohkhubor, u la ioh jingtip ruh ba ka don ka jingkhaii pashor kait kaba jur bha, tang ha kine ki ar-lai sngi ha kaba kito ki dkhar kiba kham ithuh Khasi la ong ba ki thied ha ka dor kaba jem katba ki leit pat ban die sha kiwei pat ha ka dor kaba heh, la antad ba ka jingioh nong jong ki na kawei ka pashor kait ka poi haduh T.200 ne T.300 spah tyngka.
Haba la kylli na katto katne ki trai dukan kiba pynriam ia ki dukan jong ki, ki la iathuh ba kiba bun hi ki dieng kait, ha kaba ki la ioh thied ka dei na ki thain Ri-bhoi. Haba la wad jingtip shuh shuh kumba haduh katano ki pynlut ha kawei ka dukan tang ban pynriam, ki la iathuh ba ka shong katkum ka jingheh ka dukan , kaba ka dukan kaba jingpynlut kyllum jong ki ban pynriam kam duna shuh ia ka T.15,000 hajara tyngka.