Ba shu khlein ka sorkar, yn leit ka KDA sha U Lat

Shillong, 23 Risaw:
Ka Khasi Disabilities Association (KDA) ka la thait ban ioh ia ki kular na ki myntri sorkar kyn thup na u Myntri Rangbah ki ba khlem long kam satia haduh kine ki sngi bad namar kane ka daw, ki la rai ban leit iakynduh noh bad u Lat ka jylla ban pynrulong ia ki jingdawa jongki.
U President ka KDA u Bah Starwin Kharjana u la ong ba ka jingialang jong ka seng kaba la long ha ka 11 tarik mynta u bnai, ka la rai ban shim ia kane ka sienjam ban leit iakynduh ia u Lat bad lada kam long ka jingdawa jongki, kin sa pynlong da ki jingiakhih.
U la ong ba ka sorkar ka la shu sngap mynthi ia ki jingdawa jongki ba kynthup ia 12 tylli ki mat jingdawa kaba la buh la jan saw snem haduh mynta. Ka seng ka la iakynduh ar sien ia u Myntri Rangbah bad ar sien ia ka myntri ka tnad Social Welfare hynrei ki jingkular thiang jongki, ki khlem seisoh satia haduh kine ki sngi.
“Ngi la rai ban leit iakynduh bad u Lat halor kane”, la ong u Bah Kharjana bad lada kam seisoh ngin pynlong ia ka jingiakhih kumba la rai da ka seng.
Ka sorkar ka ai baibam ia kiba duna dkhot met na ka Chief Minister Social Assistance Scheme ka don ka jingdkoh ha kaba iadei bad ka jingpynlait ia ka pisa namar ba kam ju long thikna bha. Katkum ka jingpynbna da u Myntri Rangbah baroh kiba don jingduna dkhot met kiba la ioh ia ka syrnod kum kiba don jingduna, ki dei ban ioh beit ia kane ka baibam hynrei ki don ki ophis ka Child Development Project Officer (CDPO) kim pdiang ia kiba anna dkhot kiba duna ia ka 18 snem ka rta. “Lada ka long kumne ka jingpynbna jong u myntri rangbah ka jylla kam treikam satia ia kiba anna dkhot met kiba hapoh ka 18 snem ka rta”, la ong u Bah Kharjana.
U la ong ba ka seng ka la lap ruh bun ki seng treimon sngewbha kiba shim ha ka kyrteng jong kiba anna dkhot met ban treikam hynrei ki khlem leh eiei na ka bynta jong kiba duna dkot met naduh ba la pyntreikam ka sorkar kmie ia ka ain Persons With Disablities (PWD) Act 1995. Ka KDA ka kyntu ia ki briew kiba don jingduna dkhot met ba kim dei ban ngeit biej ia kine ki seng tit kiba thmu tang ban pynlut kai ia ka por kiba leh myn iarap ia kiba duna dkhot met bad ka kyntu ia ka sorkar ba kam dei ban iarap ia kiba leh mynleh tang ban ioh jingmyntoi, la ong u President ka KDA u Bah Starwin Kharjana bad ka general secretary Kong Ibadalin Kharbuli.