Shillong: Ka Jaintia Student Union ka la thoh da ka shithi sha ka sorkar Jylla, ban kyrpad ban ym leh klet ia ki 3 tylli ki longing kiba la duh ei ia la ka jingim na ka jingbam ia u tit khlaw ha ka shnong Lamin,West Jaintia Hills District ha ka 19 tarik u iaiong 2020.
U samla Treibor lang R Suchen, President ka JSU u la ong ba ka sorkar ka dei ban pyn ioh ia ka jingiarap pisa (Ex Gratia) sha kiba ha ing jong kine ki lanot ki ba la ngat ha kane ka apot.
U la ong ruh ba sha kiwei jylla lada jia kum kine ki jingjia ba sngewsih ba bakla ban bam ia ki jingbam ba don bih ka sorkar ka ju ai da ka jingiarap pisa (Ex Gratia) sha kiba ha iing.
U samla Treiborlang u la ong, ba ka la don kum kane ka jingjia kaba ia syriem ha East Godavari District ha Andhra Pradesh ha u snem 2017 ha kaba 16 ngut ki lah khlad noh namar ba ki ioh bam bakla ia ki jingbam ba long bih bad ka sorkar jong ka jylla Andhra Pradesh ka la ai da jingiarap haduh 5 lak tyngka sha kiba ha ing ki lanot kiba la khlad noh.
Na ka liang u samla Treiborlang R Suchen, u la iathuh ba u lah ioh ban iakren bad u Rangbah shnong ka shnong Lamin u bah Golden Gashnga, halor ka jingjia ba lah dep hapoh shnong Lamin.Na ka liang u Rangbah Shnong Lamin u la iathuh ba haduh mynta ka sorkar kam shym lah iarap eiei ia ka ing ka sem jong kito ki hynriew ngut kiba lah khlad noh bad sa 11 ngut kiba la ioh pang bad kiba la ioh jing sumar ha hospital bad haduh 5 ngut kiba lah khlad ki dei na ka juh ka ing bad ki dei ki shipara trai bad uwei na ki, u dei u para ar kmie trai jong ki bad kine baroh ki dei ruh ki khunswet.
Phi don ban ong eiei?