Ki Sngi ba la leit noh (Na ka bynta ki class x)

Babu Kular Khongjirem

Ka poetry ‘Ki sngi ba la leit noh’ka dei ka poetry ba u myllung Soso Tham u la kynmaw tympang ne kynmaw kyrpang biang ia ka jingkmen, ki jingsngewbha ha ka por ba u dang long khynnah bad long samla ha shnong Sohra.Dei ha shnong Sohra ba la kha bad la pynheh pynsan ia u myllung Soso Tham.

Ha kito ki por, ka Sohra ka dang kup dang phong da ka mariang ba itynnad ha ki sawdong sawkun jongka.Ym tang ka mariang,hynrei ki briew ruh ki dang long kiba hok,kiba beit bad kiba skhem nongrim bha.U myllung kat sha leit kat sha phai,ka shnong Sohra ka dap tang da ka jingitynnad bad jingiphuh iphieng bad ka shnong ka thaw ruh ka dang beit dang ryntih khlem pat don ki nongwei nongar ki ban pynwit pynthud ia ka jinglong bakhuid bad ba kyntang jong ka mariang sha ki thain Sohra.

Dei na kata ka daw ba,u myllung u la kynmaw biang ia kiei kiei ki jingitynnad,jingsngew bha ha ka por ba u dang long tang kum u khynnah ha Sohra bad haba u kynmaw biang ia kinebkiei kiei baroh,u kwah bad angnud ba kito ki por ba kordor kin wan phai biang sa shisien ha ka jingim rangbah jongu. Namar ba u Soso Tham u la hikai ha Goverment Boys’High School,Shillong,kumta u la shong la sah beit ha Shillong bun bun snem.Um ju kham poi shuh sha Sohra,ka shnong trai kaba la kha bad pynheh pyn rangbah ia u.Ha kawei ka por,katba u dang kynmaw ia ki por kiba la dep,u la kynmaw biang ia kito ki por bad ki jingjia kiba pynsah jingkynmaw ia u myn ba u dang don ha Sohra kum u khynnah.

Ha ka dkhot kaba nyngkong(dk.1)’ Ngan leit…. ka ri ka akor,’ u myllung u la pynpaw bad ringdur ba u kwah biang ban leit sha shnong Sohra sa shisien.Ka ktien’ri Sohra’ ka mut ia ka thain bad ka shnong ba kham heh(eg.Ri Bhoi,ri War,ri Lyngngam,etc) namar ka jingitynnad bad jingphuh jong ka mariang kyrhai.Kat sha ba phai ne kat sha ba leit, la sha lum ne sha wah,ki don beit kyrhai ki jait syntiew bapher bapher baroh shi saw aiom. Napdeng bun jait ki jait syntiew u myllung u jer kyrteng tang ar tylli ki jait syntiew kiba kham kynrei sha ki jaka lum jong ka Sohra bad kita ki long, u tiew sohkhah bad u tiew pawang lum.

Ki don ruh kyrhai ki jait sim kiba don sha ki sawdong sawkun ka shnong Sohra kiba ju pah bad rwai sngewtynnat ha ki jait sur bapher bapher.Napdeng ki jait sim kiba kynrei sha ki thain Sohra pat,u myllung u la jer kyrteng tang ar jait,bad kita ki dei ka sim pieng bad u kaitor(u jait sim uba rit hynrei uba nang bad bha ryngdang eh ban pah).

Ka jingpah bad rwai jong ki jait sim bapher bapher ka pynsngew bang bad pynsngew myllung ia ka ri Sohra.Ka Sohra ka dei ruh ka thymmei jong ka thoh ka pule ha ri Khasi-Jaintia namar dei ha kane ka shnong ba u Thomas Jones u la shem ia ki dak thoh dak pule khasi(khasi alphabet)A,D,K,ter ter ha ka ktien Sohra bad ba ka ktien Sohra namarkata, ka la kylla long kum ka ktien thoh ktien pule ba ia sngewthuh lang solonsar ha kylleng sawdong ka ri Khasi-Jaintia.Ym tang katta,ka Sohra ka dei ruh ka thymmei jong ka akor ka burom ki khasi naduh ki por mynshwa.Ki ju ong ia ka ri Khasi-Jaintia kum ka ri jong ka akor ka burom,ka ri tip kur tip kha bad ka ri tip briew tip Blei.Ha kito ki por,ki nong Sohra kidei kiba bat bha ia ka ktien hok,kim ju tieng ne riej namar dei ka Hok bad ka akor kaba tam ha kane ka pyrthei.Ym tang katta,hynrei dei ruh na ka thain Sohra ba mih nyngkong eh bun ki riew stad bad ki riewkhraw,ki riew pawnam,ki riew shemphang kiba long ki khlur ba lam lynti ia ka ri Khasi-Jaintia ha ki liang baroh.Naduh u bah Joy,(Rev.JJM Nichols’Roy),u Jeebon Roy Mairom,u Rabon sing,U Soso Tham,Prof GG Swell Rajee bad bun kiwei pat ki khlur ka ri jongngi ki dei na ka thain Sohra.

Ki dei ki riew shlur,ki riew shynrang bad ki nongprat lynti kiba la lah ban pynpaw pyrthei ia ka thoh ka pule bad ka jingnang ka jingstad ha ka ri jongngi ha kito ki por ba ka thoh ka pule bad ka jingnang ka jingstad kam pat roi satia kumba ka long mynta.Dei na kata ka daw ba,u myllung Soso Tham u ai nam ia ka thain Sohra kum ‘ka ri jong ka jingshynrang ka ri jong ka akor.(yn dang bteng next Friday).