KI RONGTYRSIM : Hato ka bha ban airong ia ki tyrsim?

Kong Linda Kongwang

Ka jingpynbhabriew ka ka durkhmat, ki kti bad ki kjat ki dei kiei kiei kiba manla ki kynthei ki sngewtynnad ban leh hynrei ban sumar bad pynitynnad ia ki tyrsim ka dei kawei naki kam kiba ki kham sngewtynnad eh ban leh ban pynbhabriew bad pynitynnad ialade.

Ho’oid ka jingnang ban airong bad pynwandur iaki tyrsim ka pyni iaka jinglehkhuid bad ka main ba kyrpang haki kynthei hynrei hato phi tip ki khemikals kiba don haki ha manla ki rongtyrsim (nail paint)ki don jingma kiba lah ban pynkyndit iaphi shi katdei eh bad kiba lah ban ktah iaka jingkoit jingkhiah jongphi.

Khambun hi ki tiar ba ju pyndonkam naka bynta ki tyrsim ki don iaki khemikal ne ki kynja dawai balong bih kiba lah ban ialam sha ka jingiohpang ba har rukom lada pyndonkam palat iaki. Ka jingma jongka jingkoit jingkhiah naduh ki jingshitom ha ki bynta ba shapoh jongka met haduh ki jingpang bampong (Cancer) ka dei na ka daw jong ki katto katne ki kynja khemikals kum ki Toluene, Formaldehyde bad ki Dibutyl Phthalate.
Hangne ki jingthoh ki kdewshai shaphang ka jingktah jongka jingkoit jingkhiah naka jingpyndonkam palat iaki rongtyrsim kiba don khemikals kum ki:

1. TOLUENE:— Kine ki jait Ingredient kiba la khlehlang bad ki solvent ban ioh iaka jingphyrnai bad jyllih jong ki rong tyrsim bad kine ki jait khemikal ki pyllait naka jing dambit ki rongtyrsim haki bilor bala set iaki.kine ki khemikals haka jingshisha la ju pyndonkam haki jaka ba buh petrol hapoh kali. Ki khlein kiba mih nakine ki khemikals la ju pyndonkam haki bilor rongtyrsim bad ka jingtah ia kine haki tyrsim ki ktah shikatdei eh iaki bynta ba shapoh jongki dkhot met bad pynsniew iaki bynta be leit shabar ne leit khyndew. Kiwei kiwei ki jingshitom kilah ban kynthup iaka jingktha khlieh, ka jingsngew buaid ne shoh samthiah ki khmat bad ka jingdait ki tangkro ha u ryndang.
2. FORMALDEHYDE:–– Kine ki dei ki jait Ingredient Carcinogenic agents bala tip bad la ju pyndonkam bha ban pyntyrkhong iaki rongtyrsim. Ka jingnoh slem ki rongtyrsim haki tyrsim jongphi kadei naka daw jongkine ki khemikals. Nalor kine la ju pyndonkam ruh ban khlehlang haki tiar ba ju leh manicure bad pedicure ban pyllait naka khniang jingpang ba iabit hynrei daka khlehlang iakine ki khemikals ka ktah iaka sniehdoh bad iaki sawdong ki tyrsim jongphi.
3. DIBUTYL PHTHALATE:— Ia kine ki khemikals la ju pyndonkam ban khlehlang naka bynta ban ioh iaki rong tyrsim kiba jem koid koid. La kumno kumno kine ki khemikal kidei ka daw bah kaba pynsniew bunshah iaki bynta ba shapoh jongki dkhotmet. La ju pyndonkam iaki na ka bynta ban pyllait naka jingorpait ki rongtyrsim bad khoh ring malu mala. Ka jingpyndonkam iaki Phthalate la khang pyrshah haki katto katne ki Ri namar bun ki ri ki shem baka lyer jynhaw kaba mih naki ka ialam sha ka jingbymlah ban ring mynsiem bha bad kane ka wanrah jingeh shibun na ka bynta kiba bun.
   KI JINGPANG BAMPONG (CANCER) KIBA MIH NAKI RONGTYRSIM:— Ki rongtyrsim kiba don gel haki ki kyntiew iaka jingiaidiew kine ki rongtyrsim naka daw ka jingneh slem ki rongtyrsim haki tyrsim khlem da pynkhuid. Ki nongwadbniah dangshen ki ong ba ki rongtyrsim kim dei ki daw bah jongka jingshah ktah haki jingpang hynrei ka rukom pynrkhiang iaki tyrsim kadei ka daw kaba wanrah jingma shi katdei eh ban ioh iaka jingpang bampong haka sniehdoh (skin cancer). Ka jingpynrkhiang iaki rongtyrsim daka UV Lights ne ban pynshah haka sngi bad kaba pyndonkam iaka pangkha (fan) ki kyntiew iaka jingkhlain ka jynhaw kaba mih naki bad haba kine ki jynhaw ki ngat haki sniehdoh jongphi naka por sha ka por, ka ialam sha ka jingpang bampong jongka sniehdoh (skin cancer).
   KUMNO BAN JIED IAKI RONGTYRSIM BYMDON KHEMIKALS?:— Pyrshang ban jied daki rongtyrsim kiba ka jingkhleh khemikals kam duna ia ka 0-2 ki khemikals. Kane kalah ban long kaba eh shibun namar bun nangi ngim tip ne ithuh laki rongtyrsim ki bun ne duna ka khemikals. Hynrei haba thied iaki rong tyrsim pyrshang ban pule bniah iaki jingthoh bala thoh haki bilor ki bym kynthup haki iaki Toluene, ki Formaldehyde, ki Dibutyl Phthalate bad ki Camphor. Da kaba leh kumne , kan iarap iaphi bad iaki nongdih ban jied bad die tang ki mar kiba bha bad ki bymdon khemikals haki.
   KA JINGAI JINGMUT NAKA BYNTA KA JINGKOIT JINGKHIAH JONGKI TYRSIM:—
   1.Ka jingpyndonkam iaki rongtyrsim kala long ka jingmlien na ka bynta kiba bun, namar kata pyrshang ban pyndonkam ne tah teng teng tang haki por ba donkam bad pyrshang ban pynkhuid iaki ha kajuh ka miet shuwa ban thiah.
   2.Ieh iaki tyrsim jongphi khlem da airong na ka bynta katto katne sngi man la u bnai.
   3.Kiar ban ring mynsiem iaki jynhaw kiba mih haba plied iaki bilor jongki rongtyrsim.
4. Kiar na kaba pyndonkam iaki rongtyrsim kiba don iaki khemikals kum ki Toluene, ki Formaldehyde, ki Dibutyl Phthalate dakaba khmih bniah iaki jingthoh ha u bilor rongtyrsim.
5. Kiar na kaba pyndonkam khamtam iaki rongtyrsim kiba don gel bad ka jingpyndonkam da ki UV Light ban pynrkhiang ia ki.
   Khublei