Shah hiar thma ka Parliament ka Canada

Ka Ing dorbar ka Canada ka la shah hiar thma mynta ka sngi ha kaba uwei u ehrang, u la ioh ban rung hapoh katei ka iing dorbar bad u la synreit bun kuli, ki lad khubor ki la iathuh ba shuwa ba u ehrang un ioh rung shapoh Parliament u la synreit kuli ia uwei u shipai ha Ottawa bad utei u shipai u la mynsaw jur bad hadien kata u la rung shapoh ka iing dorbar jong ka Parliament namar ka jingthwet ki pulit bad hangtei u la pynbthei haduh 30 kuli iathuh ki briew kiba la ioh sakhi da la ki jong ki khmat sha ki lad khubor.
Kawei na ki lad khubor ha ka Ri Cananda ka la iathuh ba utei u ehrang u la shah siat iap hapoh katei ka building jong ka Parliament bad haduh mynta ym pat lah ban pynthikna la u don marwei ne ki dang don kiwei pat ki paralok jong u. Hynrei ki pulit jong ka Ottawa ki la suba jur ba dang don shuh kiwei pat ki ehrang kiba la wan lang bad utei u ba la kyllon iap.
Ha katei ka jingshah hiar thma ki pulit ki la ker bad iada khnang ba u myntri rangbah duh katei ka ri u Stephen Harper, un ioh mih na katei ka iing dorbar, ha kaba u la ioh mih khlem shah pynmynsaw. Kham hadien ki lad khubor ki la iathuh ba ka la don ka jingbynreit kuli kaba kham jur shuh shuh hajan jong ka Parliament bad la suba ba dang don ki ehrang kieng atiar ha katei ka jaka.Ki pulit ki la pynthylli lut ia katei ka jaka kaba don hajan ka Parliament bad ki la beh lut ia ki paidbah kiba leit ba wan ki la pyrta ruh, ‘ka dang don jingma’.
Katkum ka jingiathuh ki lad khubor la iathuh ba kham ha shuwa ia kane ute u ehrang u la pynsangeh ia kawei ka kali rong iong da kaba pynap suloi ia u nongniah bad u la sei ia u nongniah shabar khlem pynmynsaw, bad u la niah da katei ka kali sha Centre Block kaba don ha Parliament Hall, kaba ka jingtei ka dang iaid shakhmat. U la tynrah ruh ia kawei ka longkmie kaba dang rah khun, kaba lynniar da ka jingtieng hynrei u khlem pynmynsaw eiei ia ka ne ia u khun jong ka. Ka Centre Block ka dei ka jaka treikam kaba heh tam ha Parliament kaba la don bun ki tnad treikam hynrei kham hadien la iathuh ba la khang kut noh ia katei ka iing bad dang don ruh bun ki nongtrei kiba shah khang kut ban ym ailad ba u ehrang un ioh shabar.