T.40 lak mang ka sorkar jylla ban pyn itynnad ia ka Motphran

Shillong, 21 Risaw:
Ka sorkar jylla ka la mang T.40 lak na bynta ban pynitynnad bad ban pynwandur ia ka thain Motphran kaba dei kawei na ki jaka ba bun briew tam. Kane ka jingpyn ityn nad kan kynthup lut naduh ka rukom pyn bha ia ka surok ka lynti syngkien bad yn pynrit ruh ia ka jaka ba ieng u Motphran.
Haba iakren bad u Executive Engineer ka Shillong Central Division PWD U Bah HS Basaiaw moit, u la ong ba na kane ka T.40 lak la mang ruh na bynta ban pynpra ia ka kynroh kaba don ha liang ka painkhana jong ka Shillong Municipal Board bad yn sa shna thymmai biang ia ka kynroh khnang ban pynitynnad ia ka Motphran.
U la ong ba ia kane ka jingshna ban pyn itynnad yn pyndep shwa ka Kristmas. Ia ka jaka ba ieng u Mot phran kin pynrit noh ia ka jaka kumba 3 mitar khlem pynpra ia u Mot.
Hadien ba la dep shna ia ka Motphran kan sa kylla dur bad nalor ka leit ka wan ruh kan pyn suk, ia ki paibah kiba iaid ba ieng ha kane kane jaka, la ong u Bah Basaiaw moit.
U la ong ba ha ka jingshisha ka tnad PWD ka la thmu ban pyndep kham kloi ia ka jingshna ia ka Motphran hynrei namar ba ki pyntrei tang da miet ia ka Motphran ka la pynlong ia ki ba kin suki ha ka rukom trei.
Lah ban kdew ba dang shen ka kong Roshan Warjri ka la leit ban jurip ia ka Motphran ban pynitynnad bad ban pynwandur biang hadien ba ladep pynpra ia ka jingkieng.