Buh kyndon ka DC, na ka bynta ki dukan ha Khyndailad, Motphran

Shillong: Ka ophis trei kam Deputy Commissioner (DC) East Khasi Hills mynta ka sngi ka la pynmih ia ka hukum ban batai halor ki kyndon naka bynta ban plie iaki dukan ha Khyndai Lad, Keating Road, G.S Road, Jail Road, Cantonment bad ha Motphran.

Ka hukum ka batai ba ki dukan ha kine ki jaka ki dei ban plie katkum ki nomber ba la ai bad tah ha man ki dukan katta naduh 1 haduh 6 bad ki dukan ki lah ban plie naduh 8 baje mynstep haduh 8 baje mynmiet.

Ka hukum na ophis treikam DC ka pynshai ruh ba ki dukan Cyber Café, Gaming Parlour ki cinema hall bad ki lottery Counter kim pat shah ban plie.
Ka hukum ka batai ruh ba ki dukan ba dei ban plie man ka sngi ki kynthup ia ki dukan sam bad die marbam, ki jaka shna maw block ha ki jaka kham pajih na nongbah shillong, ki karkhana cement, ki dukan die bad sam marbam mardih kumjuh ruh iaki jaka sumar mrad bad ki dukan baroh kiba kham pajih na nongbah Shillong.

Haba dei bad ki dukan ba don tang marwei kin plie katkum ki nomber ba la ai kata 2,4,6 ha ka 22 tarik 1,3, ha ka 23 tarik 2,4 haka 24 tarik 1,3 haka 25 tarik 2,4 haka 26 tarik 1,3 ha ka 27 tarik 2,4, 29 tarik 2,4 bad ha ka 30 tarik  jylliew 2020 ki dukan ba shah plie kin dei kiba don ia ki nomber 1,3.

Katba ki dukan kiba don hapoh Glory Plaza, JM Towers bad ha Jivan Complex kin plie katkum ki nomber 1 haduh 6 bala btah ki bor sorkar kata ha ka sngi nyngkong ki dukan ba don nomber 3 kin plie bad  hadien katta kin bud sa ki dukan ba don iaki nomber 4,5,6,1,2.
Ka hukum na ophis treaikam DC ka la kdew ruh ba ki dukan dielang, ki dukan die dawai ki dukan die dawai mrad, ki dukan kyiad ki dukan shna bad die kali, ki petrol pump bad ki dukan die marbam ba rah sha ing kin plie man ka sngi.
Ka hukum na ophis treikam DC ka kyntu ruh iaki trai Shopping Mall ba ki dei ban khanglad ia ka jing ialum briew hapoh ki shopping mall bad ki trai dukan ki dei ban pynbiang ban iaki jaka sait kti bad pynbiang ruh ia ki dawai sait kti lane ki ‘hand sanitizers’ bad ia ki tiar ban eksamin ka jing shit met ki paidbah ha shwa ba kin rung shaki dukan.