“Ngi bakla khlem pyntip ia ka Phudmuri”

Shillong, 21 Risaw:
Ka dorbar shnong jong ka Jaiaw Laitdom ka la pynpaw ba ka jingbym kynjoh ktien lem ia ka shnong Mawlai Phudmuri ban shna ia ka jingkieng iaid kali na Jaiaw Umpoh liew sha Mawlai Phud muri, ka dei ka jingbakla.
Ha ka kyrwoh ba la pynlait ki nongkitkam shnong ka Jaiaw Laitdom, kynthup u Rangbah shnong Bah D Mar baniang, Bah JS Cajee, bad Bah SB Kharbangar ki la ong ba ha ka jingiakynduh lang kaba long hynne ka sngi Hatmajai, da ka mynsiem kaba sngew khia ki la pynpaw ia ka jingbakla jong ka dorbar kaba khlem poi kynmaw ban pyntip lem ia ka dorbar shnong Mawlai Phudmuri kaba dei ka para marjan shnong ban pyniasoh ia ka jingkieng.
“Ngi pynshai ba katei ka jingbakla ba kum iaid lait, kam shym dei satia kaba don jingmut da kumwei pat hynrei ka dei tang ka jingklet jong ka shnong jong ngi”, la ong kine ki rangbah shnong ka shnong Jaiaw Laitdom.
Halor kane, na ka liang ka Jaiaw Laitdom ka la kyrpad ia ka Mawlai Phudmuri ba kin nym sngew eiei halor ka jingbakla bad kan iai burom ha ki por baroh bad kular ruh ban ai ia ka jingiatreilang ha ki kam pynroi bad kiwei ki kam na ka bynta ka bha ka miat ka imlang sahlang.
Kine ki rangbah shnong ka Jaiaw Laitdom ki la pynpaw ruh na ka liang ka dorbar shnong Mawlai Phdumuri ka la pynpaw ba kam don shuh kano kano ka jingujor ia katei ka jingthmu ban shna ia ka jingkieng iaid kali kaban myntoi lang ia baroh.
Lah ban kdew ba ka myntri kam pohiing ka jylla kaba dei ka MLA ka thain Ka Kong Roshan Warjri ha ka sngi Saitjain ba la dep, ka la buh ia u maw nongrim na ka bynta ban shna ia ka jingkieng iaid kali na Jaiaw Umpoliew kaba hap ha Jaiaw Laitdom ban pyniasoh bad ka Mawlai Phudmuri. Kane ka jingkieng ka la kot sha ka jinglut kaba T. 1.20 klur bad yn pyndep hadpoh 18 bnai.