Ki kynthei India, kiba ioh tnga ia u nong Nepal, kin hap ap 7 snem ban long nong shong shnong

Ka Nepal, mynta ka sngi, ka la thaw sa kawei ka ain thymmai bad kata ka dei ka ain iathoh hapdeng ka kynthei nong India bad u shynrang uba na Nepal.

Katei ka dei ka ain, kaba la pynbna da U Ram Bahadur Thapa, myntri kam poh iing jong ka Nepal, ha kaba u iathuh ba kano kano ka kynthei nong India, kaba ia poi kha bad u shynrang uba na Nepal, kan hap ia shong shwa bad u tnga jongka, na ka bynta hynniew snem kynthih bad hadien kata, kan sa ioh ia ka hok nongshong shnong ba pura jong katei ka Ri.

U Ram Bahadur Thapa, u iathuh ba katei ka dei ka ain, kaba la pyntrei kam ha India ruh, ha kaba ki nong Nepal, ki lah ban kylla long ki nongshong shnong jong ka India, hadien 7 snem, ba ki la ia shongkha bad u ne ka nong India.

Ka India bad ka Nepal, ki don mynta ha ka jing ia kynad kaba jur hadien ba ka Nepal, ka la dro thymmai ia ka map jongka, da kaba kynthup ia lai tylli ki jaka, kiba don ha ka jing ia knieh hapdeng ki ar tylli ki Ri bad kitei ki kynthup ia ka Kalapani, Limpiyadhura bad ka Lipulekh.