Pynrem ka DS Umsning Proper ‘B’ ba bret khyllung

Nongpoh: Ka Dorbar Shnong Umsning Proper ‘B’, lyngba u Rangbah Shnong, u Bah Rocky A. Marwein, ka la pynrem jur ia ki briew kiba la leit ban bret ia I Khunlung hajan ka phyllaw iing uwei u briew ha katei ka shnong.

Haba iathuh ia katei ka jingjia, kaba la tip paidbah ha kine ki khyndiat sngi ba la dep, u Bah Rocky A Marwein, u la iathuh ba katei ka metiap I khunlung ba dang shu kha, la wan bret da ki runar bad la lap nyngkong ia katei ka metiap da ki nongtrei uwei u doctor.

 Kumta haba iadei bad katei ka jingjia, na ka liang ka shnong ka pynrem jur ia kiba donkti bad ha kajuh ruh ka por ka shnong ka kyntu ia ki briew ka ain ba kin pynlong ia jingtohkit kaba jur, khnang ban lap ia kiba donkti baroh bad ban pynngat ia ki ha ki jingshah pynshitom kiba katkum ki kyndon Ain.