Mih ki samla Presbyterian Jowai ban kynshew snam

Jowai:Ki samla jong ka jingiaseng Samla ka Balang Presbyterian, Jowai lyngba ka Blood Donation Cell jong ka, ki la mih sha khmat ban leit ai sngewbha ia ka snam jong ki ha ki jaka kynshew snam kaba don ha Panaliar Jowai myn hynnin ka sngi Thohdieng. 

Katei ka tnad jong ka Balang Jowai ki la ia shim bynta bun bun sien ha kaba leit ai sngewbha ia ka snam jong ki sha ki nongpang kiba donkam snam ha Dr. Norman Tunnel Hospital (KJP Assembly) hynrei hadien ba ka sorkar ka la pynmih ia ki kyndon mynta ki la wan sha khmat sha katei ka jaka kynshew snam ka sorkar.

Ka snam ka long kaba kordor haduh katta namar lah ban ioh ia ka tang na ki para briew bad katta ruh haba iadei ka group namar ki riewstad ka pyrthei kim pat lah ban shna ia ka snam ban pynim ia u briew haba jia ka pang ka shitom bad ka mynsaw.