Mih ka RBYF, ki Nongniah kali bad MDC ban maramot ia ka surok ka thain Umtrai

Nongpoh:Ka jingbym shimkhia ka sorkar jylla ban iarap ha ka ban pynioh ia ki surok kiba kham bha ha ki shnong nongkyndong, ka la pynjynjar bad pynsyrtok shikatdei eh ia ki paidbah kiba sah ha kiba kum kitei ki thain, ka sakhia kaba shai eh halor kane, ka dei halor ka jingsniew kaba palat jong ka surok, kaba lah ruh ban ong ba ka dei ka surok khappud, kata na Umjari ter ter sha Umtrai bad Umsiang.

    Haba iadei bad ka jingsniew katei ka surok, myn hynnin ka sngi ki nongialam ka RBYF, ha ryngkat ka jingiatreilang ka kynhun ki Nongniah kali, ki riew kylluid mynsiem na ki shnong kiba don ha ka thain Umtrai, kata kiba kynthup ia ka shnong Umtrai, Umlaper, Mawker, Mawshang bad Umsiang lem bad u MDC ka Mawhati, hynnin ka sngi ki la iamih paidbah ban maramot ia ki bynta ba la sniew palat jong katei surok na Umtrai sha ka Lad kaba leit sha ka shnong Pamlatar.

   Haba iadei bad katei ka jingmaramot ia katei ka surok, u Bah S.B Marbah, nongialam ka RBYF, u la ong ba nongrim kaba la pynlong ia ka seng ha ryngkat ki nongniah kali bad ki riew rangbah jong katei ka shnong ban iamih paidbah, na ka bynta ban maramot ia katei ka surok, ka dei hadien ba ki la iohi ba katei ka surok ka la sniew shaba palat bad kaba dei ruh ka surok kaba donkam tam ia ki 25 tylli ei ei ki shnong kiba don ha katei ka thain.

    U la ong ruh ba kumba ka seng ka kyntu ia ka sorkar jylla ba ka dei ban pynbha noh ia katei ka surok, khnang ban pynsuk ia ka leit ka wan jong ki paidbah kiba sah ha katei ka thain, kaba dei ruh ka thain kaba don ha khappud ka Meghalaya-Assam.

     Ha kawei pat ka liang, utei u nongialam ka RBYF, u la ai ka jingkhublei ia u MDC ka Mawhati, namar ka jingshimkhia ka jong u bad uba la don bynta naduh kaba sdang haduh kaba kut jong katei ka jingmaramot ia katei ka surok.
    Katba na ka liang u Bah Charles Marngar, u la ai ka jingkhublei ia ki nongialam ka RBYF, ia ki nongniah kali bad ruh ia ki riew rangbah jong katei ka thain, namar ka jingshimkhia jong ki ban maramot ia katei ka surok, na ka bynta ban pynsuk ia ki paidbah nongleit nongwan bad khamtam eh lada don ki kam kiba kyrkieh kum ha ka pang ka shitom.
  U MDC ka Mawhati, u la kyntu ruh ia ka sorkar ba ka dei ban pynkhat kham kyrpang ha ka ban pynbha ia katei ka surok, kaba dei ruh kawei na ki surok kaba donkam tam na bynta jong kito ki paidbah kiba sah ha khappud ka Meghalaya bad Assam.